MAGSAYSAY, Davao del Sur -- Nakatabang sa mga mag-uuma ang pagbundak sa ulan sugod Lunes hatud sa bagyong “Chedeng”.
Dugay rang nipadayag sa ilang kabalaka ang mga mag-uuma sa lungsod human milungtad ang taas nga init hatud sa El Niño.
Ang Municipal Agriculture Office (MAO) nagpadayag nga nakatabang sa damyos ang maong bagyo nga nahimo nang low pressure area (LPA) ug padayong nihatag og uwan sa dakong bahin sa Mindanao.
Ang mag-uumang si Eusebio Gunding, 43, nagbutyag nga nalipay sila sa uwan tungod kay miliki na ang yuta sa ilang basakan.
Unang nagdeklara ang MAO nga mitala na sa P8 milyones ang damyos sa mga pananum diin ang uban wa pa makaani sa ilang basakan.
Sumala ni Helen Carampatana, MAO officer sa lungsod, nga padayon pa nilang ginasuta ang ubang damyos sa mga pananum human naapektuhan sa hinay nga El Niño ang mga mag-uuma sa ilang lugar.
Nanghinaut sab ang mga mag-uuma nga magpadayon ang hinay nga mga pag-uwan aron makatuhop sa ilawom sa yuta sa ilang kaumahan. (Orlando B. Dinoy)