MAGUINDANAO PROVINCE -- Bungkag ang lawas sa Iraqi national nga giingong sakop sa Islamic State of Iraq and Syria (Isis) sa padayong law enforcement operation sa Joint Task Force Central sa probinsiya.
Ang napatay nga Abdul Rahman, giingong eksperto sa paggama og improvised explosive device (IED) nga matud pa giprotektahan sa grupo ni Shiek Esmail Abdulmalik, alyas Kumander Abu Toraife sa Bangsamoro Islamic Freedom Fighters (BIFF).
Sumala pa nga apil si Rahman sa mga napatay nga BIFF sa air-to-ground assault sa militar sulod sa SPMS Box sa Maguindanao.
Dugang nasayran gikan sa militar nga si Rahman mao sab ang nagdala sa mga itom nga bandila sa ISIS, uban ang napulo pa ka langyaw nga terorista nga anaa sa poder ni Kumander Abu Toraife.
Padayon pang gisubay sa mga awtoridad ang mga nahisgutan samtang padayon ang operasyon batok kanila nga gipangulohan ni 6th ID Chief, Major/General Cirilito Sobejana. (Edgar E. Fuerzas)