ALBUERA, Leyte - Nasikop sa kapulisan ang usa ka municipal councilor sa Albuera, Leyte gumikan sa ilegal nga pagpanagat.
Giila ang nadakpan nga si Konsehal Miguel Retuya, 70, taga Poblacion Albuera.
Base sa report sa Police Regional Office 8, nihimo og seabourne patrol ang kapulisan sa lungsod uban sa taga Bureau of Fisheries and Aquatic Resources (BFAR).
Mga alas 10:30 sa buntag, Biyernes, Marso 15, 2019, naabtan nila ni Police Officer 1 Christopher Caramonte sa Albuera PNP ug Johan Manoel Avorque sa BFAR ang konsehal nga nanagat sa kadagatan sakop sa Balugo ug Damulaan.
Naaktohan sa awtoridad nga ilegal ang gihimo niini nga panagat nga pinaagi sa sinsoro.
Nasuta sa taga BFAR nga nihimo sa pagpanagat ang konsehal, 2 kilometros gikan sa baybayon sa Albuera.
"He should not be doing that. Yung gamit niya ay commercial fishing vessel. More than 3 gross tonnage na ang vessel niya, so, dapat 15 kilometers yung layo niya sa shoreline" matod ni BFAR 8 director Juan Abaladejo.
Gawas niini, migamit usab og iligal nga fishing paraphernalia ang konsehal.
Gidala sa stasyon sa kapulisan ang konsehal samtang ang gikustodiya sa BFAR ang fishing boat niini ug mga gamit mga mikabat sa P1,000,000.
Si Abaladejo nga nahinabi sa Superbalita Cebu niingon nga sila mismo ang mopasaka og kasong administratiba ug kriminal batok sa konsehal.
Hatagan usab ni Abaladejo og kopya ang Department of Interior and Local Government (DILG) sa kasong ipasaka.
Nag unang panginabuhian sa Albuera Leyte ang pagpanagat.
Matod ni Abaladejo, sa Eastern Visayas, 122 ka munisipalidad ang walay hugot nga implementasyon sa anti illegal fishing law diin usa na niini ang Albuera Leyte.
Ang BFAR ug PRO 8, dunay kasabutan nga magtinabangay sa pagsumpo sa ilegal nga pagpanagat lukop rehiyon. (JKDP)