KANANGA, Leyte--Dul-an sa 40 ka benipisyaryo sa mga balay nga gipatukod sa Tzu Chi Foundation sa Barangay Sto. Niño sa Kananga, Leyte namalhin na.
Ang maong mga benipisyaryo mga biktima sa 6.5 magnitude nga linog niadtong Hulyo 2017.
Nakadawat na usab og mga certificate ang 39 ka benipisyaryo gikan sa lokal nga kagamhanan.
Kini nagpamatuod nga sila ang tag-iya sa balay nga ilang puy-an.
Matod ni Kananga Leyte Mayor Rowena Codilla ug Vice Mayor Eming Codilla, ang maong certificate nagpamatuod nga way mahitabong pagpapahawa kon di mobotar kanila sa piniliay o ang gitawag sa uban nga “no vote, ibot”.
Ang maong certificate silyado sa kasabutan sa Tzu Chi Foundation ug sa tag-iya sa yuta nga si Engr. Violy ug Ondo Codilla.
“Walay angay ikaguol ang mga benipisyaryo sa eviction issue o kining no vote ibot kay ang certificate selyado between Tzu Chi and the lot owner Engr. Ondo and Violy Codilla,” matod sa Mayor.
Hangtod karon, wa mohunong ang lokal nga kagamhanan sa Kananga nga makakita og paagi pagtabang sa mga biktima sa kalamidad. (JKDP)