ANG Commission on Elections ( COMELEC) molahugay sa ilang mga election officer sa lalawigan sa Sugbo.
Si Atty. Jerome Brillantes, sa Comelec Cebu Province, nagkanayon nga moepekto ang lahugay sa kapin 50 ka election officers sugod Marso27 kun duha ka adlaw sa di pa magsugod ang kampanya para sa lokal nga kandidato.
Si Atty. Marchel Sarno sa Cebu City north district maoy mohulip kang Atty. Edwin Cadungog sa Cebu City south district samtang si Cadungog gibalhin sa Mandaue City.
Si Atty. Anna Fleur Gujilde sa Mandaue gidestino sa ngadto sa Naga City samtang si Atty. Chauncey Boholst sa Carcar City maoy mohulip kang Sarno.
Si Atty. Michael Angelo Sarno sa Toledo City maoy mohulip kang Boholst samtang si Atty. Gallardo Escobar sa Talisay City maoy mohulip kang Sarno sa Toledo ug si Atty. Charisse Faith Sojor sa Naga City maoy madestino sa Talisay City.
Si Election Officer Atty. Anne Janette Lamban sa Lapu-Lapu City gidestino sa Bacolod City.
Si Atty. Ferdinand Gujilde magpabilin sa Office of Provincial Election Supervisor ( OPES).
Gitug-an ni Brillantes nga gituyo sa Comelec ang pag-reshuffle sa ilang mga EO aron magpabilin ang patas ug matinud-anon nga election karong Mayo 13.
Iyang gipasabot nga sa maong paagi, malikayan kon aduna may pagduda ang katawhan sanglit wa niya gisalikway nga adunay mga kandidato nga suod sa mga pulitiko sa iyang distrito o LGU.
Ang paglahugay naandan nang gibuhat sa Comelec matag dunay eleksyon.
Di lang kay ang election officers lang, lakip na usab ang Philippine National Police (PNP) maglahugay matag piniliay sa ilang mga ginsakpan nga dunay kabanay nga modagan.
Likayan gihapon nga mapasanginlan nga dunay gilabanan ang usa ka pulis.
Lakip sa gipamalhin nga mga EO mao ang mga nadestino sa Lalawigan sa Bohol ug Negros.
Mabalik sa iyang gihuptan nga position ang mga EO karong Hunyo 12, paghupas sa election ban.