NIKABAT na og 3,370 ka mga tawo ang naserbisyohan sa E Patrol Bus sa Land Transportation Office (LTO) 7 gikan sa 22 ka local government units sa lalawigan sa Bohol ug Sugbo.
Base sa record sa buhatan ni Regional Director Vic Caindec, ang maong mga tawo maoy nakakuha og student permit, renewal sa driver’s license ug motor vehicle registration.
Ang E-Patrol bus, adunay computer equipment ug naka-link sa main data banks sa LTO diin maprinta ang lisensya apan dili pa plastik.
Lakip sa mga LGU sa Bohol nga naserbisyohan mao ang Panglao, Dauis, Garcia-Hernandez,Jagna ug Valencia.
Sa Sugbo, ang dakbayan sa Carcar, mga lungsod sa Sibonga, Argao, Dalaguete, Alcoy, Boljoon, Oslob, Santander, Samboan, Ginatilan, Malabuyoc, Alegria, Badian, Moalboal, Alcantara, Ronda ug Dumanjug
Ang maong mga lungsod maoy naserbisyohan sa LTO gikan Pebrero 18 hangtod sa Marso 15 ning buwan.
Sa kasamtangan, ang E-Patrol tua sa lungsod sa Tuburan nga molanat hangtod Marso 22 ug sa Marso 25 motabok sila paingon sa Sta. Fe sa Bantayan island.
Si Caindec nagkanayon nga pinaagi sa E-Patrol bus, ilang napadauol ang serbisyo sa LTO ngadto sa mga layo nga lungsod ug mahatagan sila og kahigayonan nga makakuha og student permit ug renewal sa drivers license ug motor vehicles registration.
Matod sa pangulo sa LTO 7 nga mobalik sila sa nahisgutang mga lungsod aron paghimo og driving seminars uban sa tabang sa mga federation sa bikers club kinsa maoy guest speakers ug motabang sa pagtudlo sa safety driving.
Human niini, kon makapasar sila, ang ilang mga student permit mahimo ba nga i-upgrade ngadto sa regular driver’s license.
Si Caindec nidugang nga sa pagkakaron, ang ilang E-Patrol wala pay driver’s license card printer ug ilang paninguhaong makabutang sila aron walay hasol sa mga drayber.
Ang mga naisyuhan og driver’s license mga papel mahimo hinuon mga makapaprinta sila og plastic card sa higayon nga adunay silay panahon didto sa ilang mga temporary offsite printing office (TOPO) sa SM Seaside City sa South Road Properties (SRP), Galleria Cebu ug ubang lokasyon sa ilang TOPO. (PAC)