SA NAGPADAYON nga nasinating El Niño phenomenon sa nasod, gibutyag sa Department of Energy (DOE) Visayas nga dili ra maapektohan ang power supply sa Visayas lakip na ang Sugbo.
Samtang, andam na ang DOE Visayas alang sa piniliay karong umaabot Mayo 13.
Matod sa officer-in-charge (OIC) sa DOE Visayas Engr. Jose Rey Maleza nga tungod kay dependent sa geothermal ug coal power source ang Kabisay-an hinungdan nga dili ra makaapekto ang El Niño.
Nasayran nga wala moabot sa 1 megawatts ang hydroelectric plant nga anaa ang Visayas, usa niini anaa sa Kawasan, sa lungsod sa Badian.
Dugang ni Maleza nga anaa sa 1,800MW ang daily demand sa tibuok Visayas ug gipanglantawan pa kini nga mosaka sa pagsulod sa summer season.
Susama sa tambag sa water utilities, nitambag usab si Maleza nga magdaginot og gamit sa kuryente hilabi na nga grabe ang gamit sa aircon ditioning units karong panahon sa ting-init.
Nasayran usab nga tungod sa grabeng init, nakatampo kini sa solar plants sa Visayas diin anaa sa 400MW ang rated capacity niini apan anaa lang sa 50-70MW ang dependable niini o ang magamit.
Alas 10:00 sa buntag ngadto sa alas 3 sa hapon kini sagad magamit.
Samtang, taas gihapon ang demand sa peak hours sa gabii diin magsugod kini alas 6 sa gabii hangtod alas 7:30 sa gabii.
Alang sa umaabot nga piniliay, andam na usab ang DOE Visayas diin nihulagway kini nga aduna’y igo nga supply alang niini.
Dugang ni Maleza nga last year pa sila andam niini ug walay schedule preventive maintenance sa mga planta sa buwan sa Mayo.
Nasayran nga wala pa pormal nga nideklarar ang Pagasa bahin sa pagsulod sa panahon sa summer apan nasinati na ang grabeng kainit mugna sa gitawag nga weak El Niño nga naghulga sa kaumahan sa nasod karon. (HBL)