BISAN sa kapakyas sa Kongreso sa pagpalabang sa gi-propose nga P3.757 trillion national budget sa 2019, si Presidente Rodrigo Duterte nakakitag paagi sa pagpatuman sa gitakdang umento sa sweldo sa tanang mga kawani sa kagamhanan karong tuiga.
Si Duterte nipirma sa Executive Order (EO) 75 sa Marso 15, alang sa pagpatuman sa ikaupat nga tranche sa increase sa mga trabahante sa kagamhanan bisan kon ang Kongreso wa pa moaprobar sa 2019 budget.
Ubos sa EO 201, nga gipirmahan ni kanhi presidente Benigno Aquino III sa Pebrero 19, 2016, tanang mga trabahante sa kagamhanan makadawat og umento sa sweldo sa upat ka tranches.
Ang unang hugna gisugdan niadtong 2016 samtang ang katapusang hugna sa umento gitakda unta niadtong Enero 19.
Ang Section 15 sa EO 201 naglatid nga ang tinubdan sa pundo alang sa pagpatuman sa umento sa sweldo sa gobyerno kuhaon gikan sa tinuig nga General Appropriations Act (GAA).
Ang EO 75 ni Duterte nag-usab sa EO 201 aron mapatuman ang katapusang tranche.
Matod sa EO 75, samtang wa pa mapalabang ang 2019 budget, ang pundo kuhaon sa bisan unsang gahin nga magamit gikan sa 2018 GAA. (Sunstar Philippines)