Mga kaso sa dengue misulbong; 33 patay sa Central Visayas: DOH 7

NISAKA ngadto sa 234% ang mga kaso sa dengue fever sugod sa Enero hangtod Marso 16 karong tuiga itandi sa susamang mga buwan sa 2018.

Sa uwahing datus sa Regional Epidemiology and Surveillance Unit (Resu) 7, kini nagpakita nga niabot na sa 5,399 ka mga kaso sa dengue ang natala sa Central Visayas, diin 33 ang kompirmadong nangamatay itandi sa 1,598 ka mga kaso ug 11 nga nangamatay sa 2018.

Kasagaran sa mga nagka-dengue nagpangedaron og 6-anyos ngadto sa 10-anyos.

Nag-una gihapon ang probinsiya sa Sugbo nga adunay daghang mga kaso diin niabot og 3,471 ka mga kaso, diin 25 ang patay itandi sa 1,257 ka mga kaso ug pito ang patay sa 2018.

Nagpabilin nga nag-una ang Dakbayan sa Sugbo nga adunay labing daghang mga kaso diin anaa kini sa 541 ka mga kaso ug lima na ang patay itandi sa 340 ka mga kaso ug duha ang patay sa 2018.

Gisundan kini sa Dakbayan sa Lapu-Lapu diin anaay natala nga 453 ka mga kaso ug usa ang patay itandi sa 140 ka mga kaso ug usa ang patay sa 2018.

Anaa sa ikatulo ang dakbayan sa Mandaue diin anaa kini 227 ka mga kaso ug tulo ang patay itandi sa 125 ka mga kaso ra sa 2018.

Gipanglantawan nga mosaka pa ang maong mga kaso karon nga ting-init tungod kay mangita ang lamok og breeding sites susama sa tubig nga gipundo.

Daan na kining gipaabot nga mosaka ang mga kaso sa mao nga sakit kon basehan ang three-year cycle. Ang katapusang pagsaka og maayo sa mga kaso natala sa 2016. Nabantayan na kini sa Department of Health (DOH). (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph