DUNAY timailhan nga gipang-delete kun gipangpapas nga mga mensahe ang 17 anyos nga prime suspect sa pagpatay kang Christine Lee Silawan sa iyang Facebook Messenger.
Tungod niini, ang National Bureau of Investigation (NBI) modangop sa buhatan sa Facebook aron magpatabang sa pag-recover sa gipangpapas nga messages.
Ilang nasayran nga bisan kon gipangpapas ang mga mensahe, duna pay makuha nga 2nd ug 3rd copy, matod sa usa ka cyber crime specialist sa NBI nga di magpahingan.
Matod ni Attorney Tomas Enrile, director sa NBI 7, nga ang ilang gibasehan sa pagsikop sa 17 anyos mao ang mga ebidensya nga ilang nakuha sa Facebook ni Silawana.
Ang Cybercrime Investigation Division sa NBI ang nakadiskobre labot sa mga mensahe nga gituohan nga gikan sa 17 anyos nga suspek nga makasurpresa sa mga nagduda nga fall guy ang ilang dinakpan base sa ilang inisyal nga resulta sa imbestigasyon.
Wa nganli sa NBI 7 ang tag-iya sa account, apan si manlalaban Vincent Isles, abogado sa suspek, niila pinaagi sa iyang Facebook post nga si CJ Diaz.
Gitug-an ni Enrile nga sa dihang ilang gihiling ang Messenger sa 17 anyos, maklaro nga gipangpapas na ang mensahe nga iyang gipadala kang Silawan apan makita pa nila kini sa account sa biktima.
“Siguro, later on you, will be surprised may mga initial findings na kami dito na talagang probably yung mga nag ki-claim na yung suspect na at his age na 17 years old, na too innocent to commit that crime. Pero base dito sa initial findings namin, kung malaman mo, magbabago ang kaisipan nyo. Sa ngayon, di pwede natin i divulge yan,” matod ni Enrile.
Nakig-alayon na usab sila sa Scene of the Crime Operation sa Police Regional Office 7 nga maoy mi kustodiya sa mga ebedensya aron i-turnover kanila, sama sa sapot nga giingong iya sa suspek, aron ipaubos sa scientific examination.
SAMAD?
Adunay samad ang suspek nga nakita ang NBI sa nawong nga posibling tungod sa pagsukol ni Silawan kaniya nga sutaon sa mga imbestigador.
Napaubos na usab sa drug test ang suspek, apan negatibo ang resulta. (AYB, GCM)