TINUN-an sa senior high school nga mograduwar na unta ning buwana uban sa iyang schoolmate nangamatay human sila nabangga sa Ceres bus samtang nag-angkasay sa motorsiklo sa may taytayan sa national highway sa Sitio Tulay, Barangay Canamucan, lungsod sa Compostela, Miyerkules sa buntag, Marso 20.
Si Earl John Gipgano,17, taga Brgy. Poblacion, Compostela, tinun-an sa grade 12 sa Compostela National High School ug iyang kauban nga si Christian Gore, 20, taga Barangay Canamucan, dead-on-arrival (DOA) sa Danao City District Hospital diin sila gipangdala.
Kasamtangan nga gitanggong si Rolando Morre, 46, minyo, taga Brgy. Mulao, Compostela, driver sa Ceres bus (1384307805).
Si SPO1 Arthur Ariate, imbestigador sa traffic police sa Compostela nga nahinabi sa Superbalita Cebu, nagkanayon nga ang mga biktima paingon sa hababagatan dihang ilang gikasugat ang Ceres bus nga paingon sa norte.
MI-OVERTAKE
Sumala pa ni Ariate nga sa ilang nakuhang impormasyon, si Gipgano maoy nagmaniho sa motorsiklo bisan kon way lisensiya ug way helmet samtang kusog kaayong nakapadagan sa motorsiklo.
Sila si Gipgano ug Gore ning-overtake sa nag-unang sakyanan ug nisulod sa pikas lane nga alang unta sa mga sakyanan nga padung sa norte.
Tungod sa kakusog sa dagan, wa na sila makabawi sa manobela, nibangga sila ilang gikasugat nga bus. Sa kakusog sa impact, si Gipgano napasok sa ilawom sa atubangan sa bus samtang si Gore nalagpot.
“Nakita nato sa CCTV dash camera sa Ceres bus nga kusog kaayo, kalit ang panghitabo. Diretso kining mibangga,” sulti ni Ariate sa interview sa Superbalita Cebu.
Si Morre nibutyag nga sa kapaspas sa panghitabo, wa na siya maka-brake hinungdan sa pagkaguroy ni Gipgano mga 23 metros ang gilay-on gikan sa bangga base sa ilang pagsukod sa sketch.
Nakaplagan sa mga pulis nga grabe ang mga kadaut nga nahiaguman sa duha ka mga biktima. Si Ariaten nitug an nga ang mga kabanay ug mga higala sa mga biktima nga ilang nakuhaag kasayuran nagkanayon nga gikan naghimo sa ilang project ang duha.
Si Gipgano gikatahong graduating karong hinapos sa Marso sa senior high school.
Apan duna sab silay nadungan nga mga estorya nga ang mga biktima gikatahong nakainom gikan sa pagpanglaag.
Ilang gipaabot ang mga kabanay sa mga biktima alang sa ilang pormal nga kaso kon mosang-at.
Apan nipahibawo na ang management sa bus company nga andam sila sa pag-abaga sa kabanay sa mga namatay alang sa pagpahiluna niini.