NAGSUWAT ko ani nga kolum atol sa akong adlawng natawhan (gahapon), diri sa Argao, ang lungsod nga kabahin na sa among panag-uban sa akong asawa. Dinhing lungsora mi nagkasinabot nga tinud-on na namo ning among panag-uban, usa ka adlaw mga napulo ka tuig na ang milabay.
Sa wa pa tong adlawa, latagaw ming duha sa akong asawa, nga niadtong panahona ako pang kairing-iring. Estudyante pa siya, gradweting sa college. Ug matod pa niya, wa pa pud siya mahibawo mag-unsa siya sa iyang kinabuhi. Basta magkuyog-kuyog mi, lingaw na siya.
Nagtrabaho na ko sa SunStar ug wa gihapoy direksyon sa kinabuhi bisan og pila ka tuig na ang milabay human migawas sa seminaryo.
Naa na koy banda. Morag kato ra ang labing importanteng butang sa akong kinabuhi. Tinuod, latagaw ko sa tanang butang, gawas sa akong pangandoy nga magsuwat ug mag-record og mga kanta nga mahimong akong ibilin sa kalibotan kon ako mopanaw na. Kahinumdom pa ko atong paggawas sa unang album sa akong bandang Missing Filemon, katong naa ang mga kantang Inday, Suroy-Suroy, Alas Kwatro, ug uban pa. Miingon ko sa akong kaugalingon, “Pwede na kong mamatay.”
Ug tinuod, usahay sa mga panahon sa akong kahubog kaniadto, maghunahuna ko unsaon pag-exit nga dili tantong sakit. Pila ka kahon nga beer ang gikinahanglan aron malup-og sa kahubog ug di na makabangon? Pwede bang mobalibad lang sa pagginhawa?
“Amaw ka! Buang!” ingon akong kairing-iring dihang ako ning gipaambit kaniya, napulo ka tuig na ang milabay. Birthday to nako. “Pag-leave, laag ta, kuwang ra kas pahuway,” ingon siya.
Ug naabot mi diri sa Argao.
Ug samtang nagtagay ming duha sa pantalan, kalit lang ming nahilom. Morag pareha mig gihunahuna. Unya? Unsa man ta ani? Sige pa ta?
Sukad sa among panag-ila, naa siyay singsing nga wa gyod niya huboa. Ingon siya hinatag kuno to sa iyang uyab sa hayskol pa sila. Nagbuwag na sila. Naghuwat tingaling kanahan nga magkabalik pa sila.
Ug kalit lang siyang mibarog. Iyang gihubo ang singsing ug iya kining gilabay sa dagat. Aron maklaro gyod nato unsa ka-drama tong higayona, imadyinon nato ang eksena in a slow motion, ug may background nga kanta sa Air Supply.
Ingon ko, “Watdapak!” Gisayangan ko kay basin pwede pa to nga maprinda.
Kon teleserye pa ni, kahibawo na ta unsay simbolo atong iyang gihimo. Wa na ni atrasay. Klarohon na nato ni.
Nagsuwat ko ani nga kolum diri sa usa ka painitan sa Argao nga ang specialty torta. Ug sa bungbong naay poster nga ang nakasuwat “Magkabahaw, Magkalami.”
Nagtinutokay mi sa akong asawa, dayong buhakhak og katawa, misudlot ang sikwate sa among ilong.
Happy birthday to me.