Barrita: Riding in tandem maundang na kaha?

GIPIRMAHAN ni Presidente Rodrigo Duterte niadtong Marso 8 ang Republic Act 11235, ang Motorcycle Crime Prevention Act. Tumong niini nga malikayan ang paggamit sa mga motorsiklo sa paghimog mga krimen sama sa mga killers nga mag-riding in tandem.

Ubos ning maong balaod himuong color-coded ang mga plate numbers sa motorsiklo sa matag rehiyon aron daling mahibaw-an kon diin kini narehistro pinaagi sa usa ka national database. Mas dagko na usab ang mga plate numbers nga kinahanglang mabasa sa gilay-on nga labing menos 15 metros.

Ang mga dagkong plate numbers ibutang sa atubangan ug sa luyo sa motorsiklo. Ang mga tag-iya kinahanglang mo-renew sa ilang registration sa Land Transportation Office (LTO) sa di molapas sa Hunyo 30 ning tuiga.

Kinahanglan usab silang morehistro sa ilang motorsiklo sud sa lima ka adlaw gikan sa pagpalit niini. Kinahanglan usab nga itaho ngadto sa LTO kon ilang ibaligya ang ilang motorsiklo.

Kadtong mapakyas sa pagparehistro sa ilang motorsiklo sud sa gitagal nga panahon pahamtangan sa silot nga gikan sa arresto mayor ngadto sa prision coreccional kon pagkabilanggo hangtod sa unom ka tuig ug multa nga gi momenos sa P20,000 ug di molabaw sa P50,000.

Gidili isab sa maong balaod ang pagmaneho sa usa ka motorsiklo kansang plate number di mabasa. Ang makalapas pahamtangan sa silot nga prision correccionmal kon pagkabilanggo gikan sa unom ka buwan hangtod sa unom ka tuig ug multa nga gikan sa P50,000 hangtod sa P100,000.

Ang maong balaod naghatag og gahom sa mga tinugyanan sa balaod sa pag-embargo sa mga motorsiklo nga di sakto ang plate number ug pagturn-over niini ngadto sa Philippine National Police. Malukat kini sa tag-iya gikan sa LTO human ipresentar ang proof of ownership, bayad sa pag-embargo ug pagtuman sa bag-ong plate number.

Kon ang motorsiklo gigamit sa paghimog krimen nga usa ka grave felony, ang tag-iya, driver, backrider o pasahero nga apil sa krimen silotan sa reclusion temporal kon pagkabilanggo gikan sa 12 ka tuig ngadto sa 20 ka tuig ngadto sa reclusion perpetua o pagkabilanggo hangtod sa 40 ka tuig.

Kon ang krimen usa ka less grave felony o light felony, ang nakalapas pahamtangan sa silot nga prision correccional ngadto sa prision mayor kon pagkpariso gikan sa unom ka tuig ngadto sa 12 ka tuig. Kon ang inimbargo nga motorsiklo ang gigamit sa krimen, ang nakalapas pahamtangan sa maximum penalty sa krimen nga nahimo.

Ang illegal nga paggamit sa motorsiklo nagtangag sa silot nga 40 anyos nga pagkapriso kon moresulta kini sa kamatayon o serious physical injuries. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph