Editorial Cartoon by Elton Mike S. Salaño
Editorial Cartoon by Elton Mike S. Salaño

Editoryal: Plate number sa motor

NAKASUGAT og managlahing reaksiyon kining balaod nga bag-o lang napirmahan ni Presidente Rodrigo Duterte nga nagmando sa Land Transportation Office (LTO) sa pag-isyu og dagko nga mga plate number alang sa mga motorsiklo.

Adunay nakauyon, apan aduna usay nakasaway.

Usa sa mga nalatid ubos sa Republic Act 11235, o Motorcycle Crime Prevention Act nga gipirmahan sa presidente, nga kinahanglan dagko, klaro, dali mabasa ug color-coded na ang mga plate number nga ibutang sa atubangan ug sa likod nga bahin sa motorsiklo.

Katuyo-an niini mao nga dali rang mailhan ug sayon masubay kadtong mga dautang elemento o kriminal nga mogamit og motorsiklo alang sa ilang pag-eskapo human sa krimen.

Wala pa mahingpit ang mga lagda ug regulasyon sa pagpatuman niini.

Alang sa mga mihangop sa nahisgutang balaod, dako kini og ikatabang batok sa mga badlungon sa katilingban ug hayan makapakunhod sa kriminalidad. Mahimo usab kining giya nga makab-ot ang hustisya sa mga biktima.

Pero sa wala makauyon, naghatag lang kini og kahasol sa mga tigmaniho og motorsiklo.

Alang kanila nga dili kini maoy solusyon nga makapakunhod sa kriminalidad kon dili ang pagpakatap og mga kapulisan sa kadalanan maoy angay ug epektibo nilang himuon.

Duna man tuod ni silay rason, pero unsaon man nato pagkahibawo kon kini usa ba sa solusyon o dili ba, kon dili nato suwayan ang pagpatuman niini.

Total, wala may mawala kanila kon kini ipatuman.

Dili ba diay mahimo ang pagpakatap og mga pulis, ug sa samang higayon, i-implementar usab ang pagbutang og dagko ug haom nga mga plate number sa motorsiklo? Ang punto mao nga adunay gihimo aron masulosyunan ang problema.

Related Stories

No stories found.
SunStar Publishing Inc.
www.sunstar.com.ph