PULIS nga gikan nitambong sa hearing sa kaso sa iyang dinakpan pipila ka mga tuig na ang nakalabay gipusil patay sa nagtaptap nga gunman, Huwebes, alas 11:45 sa buntag, Marso 21, sud sa Hall of Justice sa Dakbayan sa Danao.
Namatay diha-diha ang biktimang si SPO2 Alen Francis Villamor tungod sa daghang mga samad pinusilan sa dughan ug buko-buko.
Si Villamor, taga Barangay Looc, Dakbayan sa Danao, nadestino sa Regional Public Safety Battalion sa Autonomous Region in Muslim Mindanao (ARMM) sukad niadtong 2016 human moasumer si Presidente Rodrigo Duterte.
Matod ni PO3 Samuel Evalle, assistant investigator sa Danao police, niingon nga usa ra ang gunman, apan dunay upat ka mga backup, base sa sulti sa mga saksi.
Gikan si Villamor sa second floor sa building diin gihimo ang hearing sa usa sa mga korte.
Iyang gitambungan ang kaso sa illegal drugs ug ilegal nga paghupot og armas sa usa sa iyang mga dinakpan kaniadto.
Padung na siya sa main door nga bildo dihang gisugat siya sa nagtaptap nga gunman.
Diretso siyang gipusil sa makadaghan tumong sa dughan.
Human matumba si Villamor ug nakulob, giusban pa siyag pusil tumong sa buko-buko.
Dali nga nigawas ang gunman nga gisundan sa laing upat ka mga tawo nga diha na daan sa sulod.
Ningsakay sila sa awto nga puti nga gi-park tunga-tunga sa Hall of Justice ug Commission on Elections (Comelec).
Wa na masayri diin padung ang mga killer.
Gawas kang Villamor, aduna pay laing duha ang naangol sa tiil nga gidali pagdala sa Cebu Provincial Hospital sa Dakbayan sa Danao.
Mga biktima giilang sila si Gina Arong, 50, utility worker sa syudad, taga Villa Socorro, Barangay Suba; ug Angelisa Batidor, 64, nitambong sa court hearing, taga San Francisco, isla sa Camotes.
GIPLANO
Matod ni Evalle nga klarong planado ang pagpatay kang Villamor.
Atol sa hitabo, ang security guard sa main door nisaka sa second floor kay dunay gikuha.
Mga pulis ug personnel sa Bureau of Jail Management and Penology (BJMP) unang nagtuo nga usa ka huwes ang gipusil.
Lima ka mga basiyo sa bala ug duha ka slugs sa kalibre .45 nga pistola ang na-recover.
Si Villamor lumad nga taga Barangay Guintagbucan, lungsod sa Abuyog, Leyte.
Nobiyembre 15, 2001 nasulod sa serbisyo si Villamor sa Police Regional Office 8.
Pagka Pebrero 6, 2012, nabalhin siya isip iintelligence officer sa Provincial Intelligence Branch (PIB) sa Cebu Provincial Police Office (CPPO).
Hulyo 15, 2016 nalutsan siya og special order gikan sa Camp Crame aron ibalhin sa ARMM.
Samtang diha pa siya sa PIB, dinhi niya nadakpan ang akusado sa kaso nga iyang gitambungan. Wa pa makuha sa kapulisan ang ngan sa akusado sa pagsuwat ning taho.
Matod ni Police Supt. Maribelle Getigan, hepe sa Danao City police station, nga wa pa silay gisubay nga anggulo.
“Wala pa gyud ta kasubay unsay angle ani kay nagpadayon pa man ang atong imbestigasyon sa area,” matod ni Getigan.
Nagtigom sila kagahapon sa CPPO headquarters.
DRUG LIST
Si Supt. Eloveo Marquez, information officer sa CPPO, nagkanayon nga si Villamor nalakip sa listahan sa mga pulis nga adunay giingong koneksyon sa mga nalambigit sa ilegal nga drugas.
“Na-include iyang name sa mga personnel nga naay connections, allegedly sa drugs. President’s (Duterte) list and PDEA (Philippine Drug Enforcement Agency (PDEA),” matod ni Marquez.
Matod sa kapulisan, si Villamor ilang nasayran nga apil sa high value target (HVT).