NAKAPASAR sa gihimong discernment procedure sa Department of Social Welfare and Development (DSWD) ang 17-anyos nga mao'y prime suspect sa linuog nga pagpatay ni Christine Lee Silawan.
Matod ni Chief Supt. Debold Sinas, hepe sa Police Regional Office 7, nagpasabot kini nga naa na sa saktong pangisip ang suspek sa dihang gihimo niya ang krimen ug mahimo na siya nga itaral sa korte sama sa mga ordinaryong kriminal.
Ang maong resulta maoy gamiton unya sa National Bureau of Investigation (NBI) 7 sa pagpasakag kasong murder batok sa 17-anyos nga suspek.
Masaligon si Sinas nga sakto ang direksyon sa NBI 7 sa pagtumbok sa suspek nga maoy responsabli sa kamatayon ni Silawan ug nagpadayon karon ang ilang pag-abag sa maong ahensya sa pagpangita pa sa laing mga kaubanan niini.
Ang Special Investigation Task Group (SITG) nga gipangulohan sa Lapu-Lapu City Police Office (LLCPO) padayon sa ilang pagpangita sa usa ka lugar diin posibling didto gipatay si Silawan.
Matod ni Sinas nga sigun sa ilang nakita sa CCTV camera, naa ra sa duol ang posibling gihimoan sa krimen.
Lakip sa tahas sa SITG ang pagpangita karon sa lain pang mga kauban nga aduna nay pangalan gikan sa NBI 7.