GIMUGNA karon ang anti-scam task force sa tinugyanan sa Komitiba sa Trade and Commerce aron mabatokan kining mga naghitak nga scam sa social media diin ubay-ubay ka mga Kagay-anon ang nabiktima.
Atol sa gipahigayong pakigtagbo sa komitiba ni Kagawad George Goking kauban ang Security and Exchange Commission, National Bureau of Investigation, Cybercrime sa Philippine National Police, Bangko Sentral ng Pilipinas, Department of Information and Communications Technology, National Telecommunications Commission ug City Legal napasa ang maong resolusyon.
Gibutyag ni Goking nga kining mga susama nga mga pagpanlimbong usa ka pagpanabotahe sa ekonomiya diin daghan ang mga nabiktima ug mga dinagkong kantidad dili lamang sa dakbayan apan sa uban pa nga dapit.
Gidugang pa nga usa kini ka kalamidad diin mas labing dakong kadaut ang gihatag sa mga kabus nga igo lamang mahatag ang ilang hinagoan ngadto sa mga mangingilad.
“War against scammers kay economic sabotage man na looy kaayo, dako-dako man ni nga problema natabangan man gani ta atong bugas, nag-apelar ko kang President Digong nga matabangan pud ta kay daghan kaayo mga kabus nga affected ba,” matud ni Goking.
Nasayran nga nagpasa og resolusyon ang maong komitiba ngadto kay Mayor Oscar Moreno aron magmugna og anti-scam task force nga maoy motutok sa mga scam nga nahitabo. Aduna usab resolusyon resolusiyon gipadala kay Presidente Rodrigo Duterte.
Gibutyag ni lawyer Renato Egypto, SEC-Northern Mindanao Director nga dili garantiya nga mawala na ang pagpangilad gumikan kay taod-taod na nga katuigan nga anaa na kini ug hangtod karon nagpadayon pa gihapon.
“Dako na og tabang no although we cannot guarantee nga through sa pagatukoron nga anti-scam body, dili ko gatuo nga completely totally ma wipe out, erradicate nato ning problema sa scams,” matud ni Egypto.
Gidugang ni Egypto nga kung dunay magpabilin nga magpabiktima, magpadayon kini nga mga scam. Ang pinaka-importante nga buhaton mao ang pag-edukar sa katawhan sa susama niini nga mga modus.
“Kung naay mga tawo nga mga willing victims, magpahakog, magdali-dali sa kaning dali nga kita magpabilin gyud ni, the most nga siguro atong mabuhat ani is to continue educating the public sa pagpahibalo kanila nga kani nga mga modus mga scheme they have to be very careful, cautious,” dugang niini.