TALANDUGON ang kahimtang sa usa ka lalaki samtang samaran ang iyang tulo ka mga kauban human nabangga ang ilang gisakyang motorsiklo sa Diversion Road sa Igpit, lungsod sa Opol, Misamis Oriental.
Si Police Senior Inspector Princess Joy Enriquez, tigpamaba sa Misamis Oriental Provincial Police Office, miila sa mga biktima nga mao sila si Roger Mugot, 52, kinsa maoy seryosong nagrabehan ug anaa sa talandugon nga kahimtang nga anaa karon sa Northern Mindanao Medical Center.
Ang tulo ka mga kauban niini nga mao sila si Dexter Guiral 28; Anatallo Luntayao, 42; ug Andrew Amparuiges, 27; pulos taga Bagocboc susamang lungsod, ang luwas na sa makuyawng kahimtang apan pabiling giobserbahan sa mga doctor sa nahisgutang balay tambalanan.
Matud ni Enriquez nga kining mga biktima sakay sa ilang kolor itom nga Baja motorsiklo mga alas 7 Miyerkules sa gabii, Marso 20.
Usa ka giingong pick-up nga gimaneho ni Rolex Magallanes ang daw kalit nga miliko padulong sa diversion road ug gitouhang wala namatikdan niini ang motorsiklo hinungdan sa pagkasungag niini.
Tungod sa kusog nga impact milagpot ang mga sakay niini ug si Mugot maoy nagrabehan.
Sa pagkakaron anaa na sa kostudya ang driver sa pick-up kinsa posibleng mag-atubang og kasong reckless imprudence resulting to multiple physical injury.