GIKABALAKA sa usa ka senior high school nga nabiktima sa online scam nga dili mogradwar, human nga wala nay ikabayad sa tunghaan tungod na usab kay gitaya niini ang pang-tuition.
Nagpakitabang ang 18-anyos nga biktima human nga anaa sa P171 mil ang nahatag nga kantidad ngadto kang Antonnette Sestoso nga gikan ra usab sa iyang mga klasmeyt.
Gibutyag niini nga wala na nila gilaoman nga mabalik ang tibuok nga kantidad apan gusto lamang nila nga mabayaran ang ilang tuition fee aron nga maapil sa listahan sa mogradwar nga hangtud lang Abril.
“Wala nako nag aim nga mabawi pa to tanan ang amo lang nga masulbad ang among tuition fee kay dili gyud mi kapaso kay April 5 ra taman ang tingbayad unya dili nami maapil sa graduation list,” matud niini.
Gidugang pa niini nga gani wala nasayod ang ginikanan nga ingon ana ka dako ang kantidad nga nahatag ngadto kang Sestoso gikan sa mga klasmeyt ra usab niini.
“Mga six or seven sila, isa siya sa akong mga riders classmate nako siya, og nagrisk pud siya sa iyang money para sa iyang tuition fee, pambayad gyud to siya, dili pwedi ipahibalo nakabalo sila (ginikanan) pero wala sila kabalo ingon ana kadako,” dugang niini.
Samtang gibutyag usab ni Kagawad George Goking sa Trade and Commerce sa Konseho nga naluoy siya sa mga biktima.
“Luoy kaayo ang student naay uban gusto mo end sa ilang kinabuhi kay ilang tuition, naay uban gatago-tago sa ilang inahan kay gigamit ang kwarta, do not lose hope,” matud ni Goking.
Padayon usab kini nga nagpahimangno nga dili motuo dayon sa mga susama niini nga mga pasalig.
Nasayran nga nakigtagbo ang komitiba ni Goking ngadto na sa mga hingtungdan nga ahensiya sama sa Security and Exchange Commission, National Bureau of Investigation, Cybercrime sa Philippine National Police, Bangko Sentral ng Pilipinas, Department of Information and Communications Technology, National Telecommunications Commission, City Legal ug uban pa ug nagmugna og anti-scam task force.