SIKOP ang usa ka tinun-an human giingong napalitan og marijuana sa mga sakop sa National Bureau of Investigation (NBI) – Northern Mindanao niadtong ala-5 Miyerkules sa hapon, Marso 20 sa Velez-Macahambus Street ning dakbayan sa Cagayan de Oro.
Sa nahipos nga impormasyon giingong anaa sa listahan sa NBI si Stephen Dave Orosco, 18, taga Barangay Tablon, dakbayan sa Cagayan de Oro ug tinun-an sa senior high school.
Sumala sa taho, nga mag usa na ka bulan nga gipanid-an si Orosco kinsa giingong namaligya ngadto sa laing mga tinun-an.
“Naa ni siya sa atong listahan nga sigeg payuhot sa marijuana sa mga estudyante, iyang parokyano, that's why we acted immediately kay dili pwedi nga mga estudyante ang iyang gabiktimahon,” matud ni lawyer Alex Cabornay, head agent sa NBI.
Giingong napalitan ang suspetsado og pakete sa marijuana ginamit ang P5,000 nga buy-bust money hinungdan nga daling gisikop.
Ang maong suspetsado ang kasamtangang anaa sa buhatan sa NBI alang sa pagpaabot sa tukmang kaso nga ipasaka.