SA UNSANG hinungdan, kalit lang nausab ang huros sa hangin ug ang gikatakda nga pagbisita sa Cebu nila ni Ma’am Charo Santos ug Bea Alonzo nahulog sa linaw, natunaw ug nahanaw.
Gibalhin sa Davao ang pagbisita ug ang mga magdadayeg nga taga Cebu igo na lang sa pagnganga. Paet! Kabahin kini sa pelikula nga Eerie nga bahin sa mga panghitabo sulod sa usa ka monasteryo o puy-anan sa mga madre.
Sa trailer, makapalimbawot sa balhibo ang esena diin nisyagit si Bea nga pwerte ka langgis. Ang pangutana: ‘makapaulpot kaha ni sa mga tumatan-aw tungod sa kakurat ug kakuyaw?’
Atangi karong Miyerkules, Mar. 27.
•••
‘Misguided’ ug ‘nagkinahanglan og maayong manedyer parehas ni Engr. Jun Esma,’ nagkatawang sulti sa discoverer ug mentor sa Sugbuanong mag-aawit nga si JK Labajo nga mas nailhan karon isip Juan Karlos.
Seguradong pamilyar (nakasag-ulo man gani tingali) mo sa kanta nga Buwan nga gikanta ni JK. Sa wa pa siya moapil sa The Voice Teens sa ABS-CBN, gi-train siya ni Jun nga mao usab ang nakakita sa potential ni JK.
Ugaling lang kay may mga ni enter the dragon ug na-backstage si Jun. Mao nga sa controversy tali ni JK ug Darren Espanto, naluoy si Jun sa nahauna.
Pero di na kuno siya gustong mag-apil-apil pa. Napaso na siya!
•••
Usa ka lahi nga Cristine Reyes ang makita sa bag-ong pelikulang Maria nga ginama sa Viva Films, BlackOps Studios Asia ug PsyOps ug isalida karong Miyerkules, Mar. 27.
Kauban ni Cristine dinhi sila si Ivan Padilla, KC Montero, Guji Lorenzana, Jennifer Lee, Andrea del Rosario, Cindy Miranda, Freddie Webb and Ronnie Lazaro ubos sa direksyon ni Pedring A. Lopez (best director sa Los Angeles Philippine Film Festival ug sa Festival Internacional de Cine Fantastico de Torremolinos tungod sa pelikulang Nilalang).
Klaro nga na-inspire ang Viva Films sa nahitabo sa BuyBust ni Anne Curtis mao nga nihimo na sab silag pelikula nga babaye ang bida. Matud ni Direk Pedring nga panahon na nga mahibaw-an sa kalibutan nga makahimo usab ug maayong pelikulang aksyon ang mga Pinoy ug nga ang mga Pinay ‘also kick butt!’.
Nakaintriga ni dâ. Tan-awon bi!