SUKAD nga natukod ang Eiffel Tower niadtong 1889 gihugpaan na kini sa mga turista gikan sa nagkadaiyang suok sa nasud.
Dili mominos sa syete milyones ka mga turista ang mobisita sa maong struktura nga gi-ila nga ‘most-visited’ nga monumento sa tibuok kalibutan.
Kini nagpasabot nga sa matag adlaw, gibana-bana nga moabot sa 20,000 ka mga turista ang moduaw sa Eiffel tower sa “City of Love.”
Niadtong Disyembre, gibisita ang Superbalita Cebu ang maong nabantog nga tourist spot sa Paris, France.
Dili ikalimod ang kabaga sa mga mobisita sa dapit matag adlaw, gani lisod ipangita og perfect spot alang sa pagpahulagway nga-upload sa inyong social media.
Imposible sab nga mobiya dayon mo sa Eiffel Tower sa way gatusan ka mga hulagway, groufie o selfies!
Kon makahigayon kamo sa pagbisita sa tower, adunay duha ka paagi aron inyong ma-enjoy ang maong talan-awon:
Una mao ang pagsud-ong lang niini sa gawas o sa layo nga bahin.
Ikaduha mao ang pagsakay mismo sa elevator paingon sa taas sa tower.
Tambag alang niadtong mga nagdaginot (lakip na niadtong mga katkat o social climber nya way budget) nga mobisita sa maong lugar mas maayo nga motan-aw o maghangad-hangad nalang mo tower kay libre ra.
Dili na ta mangambisyon og saka kay basin og kitkit-kuko ta human sa atong #travelgoals.
Sa Trocadero station/area ninyo makit-an ang perfect view sa Eiffel Tower apan tungod kay pwerting daghanan sa mga turista, ayaw pagdahum nga wa kay photobomber sa imong mga hulagway, i-crop nalang ang hulagway kon magkalisod, aron perfect.
Ayaw sad kalimti og bitbit ang imong travel buddy/photographer kay maglisod gyud kag hangyo sa ubang turista nga magpa-picture samot na og di kahibaw mo-Iningles ang turista, na hala mag-sign language gyud mo, memsh.
Kon ka-afford ka sa 25.5 euros (P1,523), katkat gyud dayon mos pinakataas nga bahin sa tower, Apan siguradoa nga nakabook mos inyong ticket online sa ilang website in advance.
Apan sa kadtong mo-angal sa kamahal sa maong kantidad adunay laing option nga maka-katkat gihapon mo pero kutob ra sa 2nd floor sa kantidad nga 16.3 euros (mga P973).
Take note nga mas barato ang entrance fee sa mga persons-with-disabilities (PWD), mga bata edad gikan sa 4 - 11 anyos, ug 12 ngadto sa 24 anyos.
Mas maayo nga mobisita ka sa Eiffel Tower sayo sa buntag tungod kay mingaw pa og dili pa kaayo dasok sa mga tawo.
Maayo sab nga mosud-ong nalang kas Eiffel Tower sa may Trocadero diin naglumbay sa mga French restaurant ug cafe.
Kon wise ka, ikaon nalang na ang imong entrance fee inay nga makigdutdot ka ubang laing turista ug ang imong pagsud-ong sa taas sa tower, limitado ra.