SI SEN. Grace Poe gihapon ang nag-una sa Pulse Asia survey sa mga kandidato pagka-senador. Gisundan siya ni Sen. Cynthia Villa ug ikatulo si Bong Go. Nagsunod sila si Sen. Sonny Angara, kanhi Sen. Lito Lapid, Kongresista Pia Cayetano, kanhi PNP Director General Bato de la Rosa, Sen. Nancy Binay, kanhi senador Mar Roxas, kanhi senador Bong Revilla, Ilocos Norte Gov. Imee Marcos ug ni Sen. Koko Pimentel. Ang ubang mga kandidato nga posibleng modaug mao sila si kanhi senador Jinggoy Estrada, Presidential Adviser Francis Tolentino, Sen. Bam Aquino, Sen. JV Ejercito ug kanhi senador Serge Osmeña. Ang maong survey gihimo niadtong Pebrero 24 - 28 pinaagi sa face-to-face interview sa 1,800 ka mga registered voters sa tibuok nasud. Suma sa Comelec adunay 62 ka mga kandidato sa pagka-senador.
Atong makita sa resulta sa survey nga daghan nga gi-indosar ni Presidente Duterte nasud sa “Magic 12.” Wa pa gayud hinuon mo-pick-up si Cong. Dong Mangudadatu. Sa mga kritiko sa presidente si Roxas ug Aquino lang ang adunay chance nga modaug. Anaa hinuoy wala i-indosar sa PDP-Laban ug sa Hugpong ng Pagbabago nga naglawig sa survey sama kanila ni Poe ug Lapid ug Binay nga gituhoang sigurong modaug. Makaayo kining resulta sa survey sa mga maayo og showing kay daghan man ang mo-amut alang sa ilang kampanya. Apan mausab pa kining maong kamada kay layo pa kaayo ang eleksiyon.
Gituhoan nga ang mga gi-indurso ni Pres. Duterte makakuha og mayoriya sa overseas voters diin popular kaayo ang presidente. Daghang nagpusta-anay nga sa kaulahi-an si Sen. Villar o kaha si Bong Go maoy makakuha sa number one nga pwesto. Gipaabut usab nga mosaka ang rating nila ni Bato dela Rosa ug ni Tolentino. Aduna usay nagpusta-anay nga dili makadaug si Roxas ug si Aquino. Daghan kaayong nagtuo nga walay molusot nga kandidato sa Otso Deretso.
•••
Magsugod na ang campaign period sa mga local nga kandidato karong Marso 29. Inig-abut nianang adlawa kinahanglang motuman na ang mga local candidates sa mga lagda ug reglamento sa Comelec sama sa hustong gidak-on sa mga campaign material ug ang hustong butangan niini. Magsugod na usab ang pag-ihap sa campaign expenses sa mga kandidato.
Sa pagka-karon naglibug ang taga-Mandaue City kon si kinsa gayud ang gipaluyohan sa administration nga mga kandidato lokal. Nasayran nga sa dihang mi-anhi si Presidente Duterte sa Sugbo alang sa rally sa mga senatorial candidates sa Partido Demokratikong Pilipino- Lakas ng Bayan (PDP-Laban) gi-isa usab sa presidente ang mga kamot nila ni Kongresista Jonas Cortes nga kandidato sa pagka-mayor sa Mandaue City ug ang tanan niyang kandidato sa siyudad. Apan karong bag-o gi-isa ni Davao City Mayor Sara Duterte Carpio pangulo sa Hugpong ng Pagbabago (HnP) ang kaatbang ni Cortes nga si Mayor Luigi Quisumbing. Ang tanang mga kandidato sa Barug-PDP sa Cebu City nga gipanguluhan ni Vice Mayor Edgar Labella giduso sa PDP-Laban uban kang Duterte ug sa HnP ni Sara Carpio. (mannyrabacal1144@yahoo.com)