BISAN tuod og aduna nay nadakpan ug nakiha sa brutal nga kamatayon sa 16 anyos nga si Christine Lee Silawan, apan morag hanap pa kaayo nga maka-conclude ang publiko nga ang sinumbong mao na ang nakahimo sa krimen. Ang tanang mga ebidensiya nga gi-presentar sa National Bureau of Investigation (NBI) puro mga circumstantial evidence, di direct evidence o kanang adunay witness nga mitumbok sa akusado nga maoy killer.
Wa ako moingon nga dili madawat sa husgado kining circumstantial evidence apan dili lig-on nga makapa-konbikto kaniya “beyond reasonable doubt”. Mas maayo tong adunay direct evidence pinaagi sa usa ka saksi nga makatumbok sa nipatay. Bisan gani ang witness kuti-kutihon pa sa husgado. Kon masipyat ang saksi, dilikado pa nga maabsuwelto ang akusado.
Circumstantial evidence is evidence that relies on an inference to connect it to a conclusion of fact such as a finger print at the crime scene. By contrast, direct evidence supports the truth of an assertion directly. Kutay gihapon kini sa mga ebedensiya apan gikinahanglan pa nga probahon pinaagi sa mga forensic examination.
Gawas sa CCTV footage nga way klaro, ang laing gihuptan sa NBI mao ang kalo sa akusado nga adunay lama sa dugo. Gihimoan pa kini og forensic examination aron masuta kon dugo ba kini sa tawo. Kon dugo sa tawo, i-match pa kon kang Christine ba nga dugo.
Nganong miingon ko nga way klaro ang CCTV footage? Gumikan kay dili man maklaro ang dagway sa akusado. Si Christine naklaro ug giila mismo sa iyang inahan apan ang lalaki nga kuyog dili maklaro kay layo ang kuha. I-enhance pa kini sa mga expert. Ang abogado sa akusado nagkanayon nga bisan ibutang nga siya maoy nakit-ang katapusang kuyog sa biktima sa wa pa patya, dili kini igo nga siya pasanginlan nga maoy killer. Adunay Supreme Court jurisprudence niini, matod pa ni Vincent Isles, abogado sa akusado.
Sama sa akong gikaingon sa makadaghang higayon, gikinahanglan pang mangalap og dugang mga ebidensiya ang NBI aron mapalig-on ang kaso. Kay kon kini lang mga ebidensiya karon ang ilang saligan, basin mabutaw budi o matutyo ang ilang baraha kon sa piyat-piyat pa ni. (bobbygnalzaro@gmail.com)