SA NANGLABAY nga mga semana, pipila ka mga balaud ang gipangpirmahan ni Presidente Rodrigo Duterte, usa niini ang Motorcycle Crime Prevention Act.
Ang mao nga balaud gitumong aron kuno masumpo ang mga krimen nga binuhatan sa riding in tandem. Niini, nagmando ang balaud nga duha na ang mga plaka nga ipangtaud sa motorsiklo.
Kinahanglan dako, makita bisan sa gabii sa 15 metros nga gilay-on.
Kinabag-an sa mga tigmotorsiklo ning-alma tungod kay kuyaw kini sa mga tigsakay og two-wheeled nga mga sakyanan.
Tungod sa kadako, kuyaw na kini sa aksidente kay posible nga masabod. Wa usab gidesinyo ang mga motorsiklo nga butangan og dagkong mga plaka, hinungdan nga naghatag gihapon kini og kakuyaw sa sakyanan nga duha ray ligid.
Asa usab ibutang sa atubangan ang ikaduhang plaka? Kinahanglan dako gihapon ang dimension aron makita kini sa mga tawo. Kini makaapekto sa panimbang sa motorsiklo, labina kon masugat kini sa kusog nga hangin. Lain na sab kini nga posibleng makaingon og aksidente.
Kini ra bang mga krimen, apil ang riding in tandem, bunga kini sa kapakyas sa mga awtoridad sa pagsanta ug pagsulbad niini. Di kini sala sa mga tigmotorsiklo.
Kasagaran usab sa mga motorsiklo nga gipanggamit sa mga krimen way plate number o gipangtabunan. Sayon ra usab kaayo ang paghimo og fake nga mga plate number.
Gitun-an ba kaha og maayo sa mga magbabalaud kining mao nga balaud sa wa pa gipalabang? Kanang duna bay mas lawom nga pagtuon.
Sa pagpatuman na niining mao nga balaud, ang yano ug kabus nga mga nagmotorsiklo ang magbaguod sa pag-antos. Ang kataw-anan, nadugangan ang problema sa Land Transportation Office (LTO) nga wa pa makahatag sa liboan ka plaka sa four-wheeled, nia na sab ning minilyon ka plaka sa mga motorsiklo.