NAILOG sa militar ang usa ka lig-on nga kampo sa Bangsamoro Islamic Freedom Fighters (BIFF) alas 4 sa hapon, Miyerkules, Marso 20.
Gitug-an ni Major Arvin Encinas, Philippine Army’s 6th Infantry (Kampilan) Division spokesman, nga nasulod sa hiniusang puwersa sa 40th Infantry Battalion ug 1st Mechanized IB ang kampo sa BIFF sa Barangay Magaslong, Datu Piang sa Maguindanao Province.
Hinuon, wala na maabtan sa militar ang BIFF human abtik nga nakaipsot ug gibiyaan ang kampo.
Narekober gikan sa kampo ang usa ka rifle scope, 1 antenna, assorted empty shells, kuryente ug mga lansang, usa ka solar panel nga dunay bateriya, usa ka passport, medical supplies, Anti-Personnel Mines components, cellphone ug nagkadaiyang mga dokumento.
Gihulagway nga lig-on nga kampo ang nailog sa militar nga makaakomodar og 20 ka mga tawo ug napalibutan og mga running trenches, foxholes ug sniper bunkers.
Gikanayon ni 6th ID Chief, Major General Cirilito Sobejana nga usa kini sa mga kalampuson sa ilang gilusad nga Law Enforcement Focus Military Operation batok sa BIFF ug Daesh Inspired Group.
“We do not want to give them the opportunity to gather and create fear in the community, but instead we will sustain our focused military operation to end this amuck in the society,” suma ni Sobejana. (Edgar E. Fuerzas)