BISAN sa di maayo niyang pamati sa lawas, gitambungan ni Davao City Mayor Sara Duterte, pangu sa Hugpong ng Pagbabago, ang kalihukan nga gipasiugdahan sa Barug-PDP Laban sulod sa International Eucharistic Congress (IEC) Pavillion sa hapon sa Huwebes, Marso 21.
Wa man tuod iisa ni Mayor Sara ang ilang mga kamot isip timaan sa pagtuboy, alang kang Bise Mayor Edgardo Labella, ang pagtambong sa anak ni Presidente Rodrigo Duterte sa kalihukan usa na ka pagpadayag sa suporta kanila ni kanhi mayor Michael Rama ug sa tibuok slate.
Si Labella nagkanayon mga way problema kanila sanglit mismo si Presidente Rodrigo Duterte nahuman na sa pag-endurso sa ilang kandidatura.
“Dili na man kinahanglan nga iisa kay humana man giisa na ni Presidente. Ang purpose gyud ato was to promote the candidacies of the senatoriables,” padayag ni Labella.
Si Sara kalit lang nibiya sa IEC pipila ka minutos human sa iyang pagpamulong aron pag-promote sa mga kandidato pagka-senador.
Atol sa iyang pagpamulong, kadaghan siya giubo.
Niabot siya mga pasado alas 4 sa hapon sa IEC, uban kang Office the Presidential Assistant for the Visayas (OPAV) Secretary Michael Dino.
Si Sara niangkon nga naglain ang iyang lawas ug nikomedya pa sa audience ug nangutana og motuo ba sila og ‘barang’ uban sa pagkatawa sa mga nanambong. Nilanat og dul-an duha ka mga oras nga si Sara nagpabilin sa kalihukan.
Naminaw siya sa mga pagpamulong sa mga senatorial candidate nga giendurso sa HNP.
Nagpasalamat siya sa Barug PDP-Laban sa pagsuporta usab sa HNP. Si Labella nihulagway nga niining pagsuporta sa HNP, kompyansa sila nga di magduhaduha og salig ang mga botante sa ilang katakos pagdumala sa siyudad sa Sugbo.