USA ka nagpailang escort sa usa ka politiko nga nisalmot sa political rally sa Hugpong ng Pagbabago (HNP) sa dakbayan sa Mandaue ang nasikop human nakuhaan og armas Huwebes sa buntag, Marso 21.
Giila ang nasikop nga si Nelson Encabo Lim, 35-anyos, molupyo sa Sitio Cabag-o, Barangay Cogon, dakbayan sa Naga.
Nasikop ang suspek pasado alas 9 sa buntag.
Matud ni SPO3 Renato Canja, desk officer sa Centro Police Station, anaa pa lang si Lim duol sa entrance sa gate sa Mandaue City Sports Complex, nabantayan na kini sa naka-detail nga pulis sa Mandaue City Police Office (MCPO) sa lugar.
Nagsul-ob og itom nga jacket ug sling bag si Lim. Sa wala pa nisulod sa unang level sa pagsusi, gisita na kini sa mga pulis ug gisusi ang dala nga sling bag. Didto nakita ug nakuha ang armas.
“Gipangitaan ni siya og lisensya sa armas, wala'y napakita," sigon ni Canja sa Superbalita Cebu. "Ingon siya apil daw siya sa escort sa mga politico, but wala siya makasubay kon si kinsa nga politiko."
Nakuha kang Lim ang kalibre .45 nga armas nga aduna'y usa ka magazine ug pito ka bala. Nakuha usab kaniya ang usa ka I.D. nga giingong sakop sa R7 Unified Marshall.
Matud ni Lim nga usa lang siya ka mangayagay og balas sa ilang dapit ug boluntaryo isip usa ka force multiplier pinaagi sa Unified Marshall.
Dugang niya, igo ra siya niapas sa iyang mga kauban ug nakalimot nga ibilin ang iyang armas. Wala daw siya intensyon nga mohimo og dautan sa rally.
“Sa gawas ra man unta ko. Giuhaw man ko, nangita ko'g namaligya og tubig. Nisulod ko, mao nabantayan ko. Nakalimot lang gyud ko og bilin sa armas," pangangkon ni Lim. "Ako na man unta na kuhaan og lisensya, gilihok pa lang nako... volunteer lang gud, tabang-tabang sa pulis.”
Gawas sa paglapas sa R.A. 10591 o ang "Comprehensive Firearms and Ammunition Regulaiuon Act," pasakaan usab og kasong kalapasan sa Commission on Elections gun ban ang suspek.
Matud ni Canja nga gawas sa pagpasaka sa kaso, nihimo usab sila og background check sa profile sa dinakpan kon tinuoray ba nga force multiplier si Lim sa ilang lugar.
Matud ni MCPO director, Police Colonel Julian Entoma nga ipaubos nila sa ballistic examination ang armas ni Lim pagsusi kon wala ba kini malambigit sa mga insidente sa pagpamusil sa dakbayan.
Kahinumduman nga nangulo sa political rally sa HNP ang anak sa pangulo sa nasud nga si Davao City Mayor Sara Duterte-Carpio.