ANG National Bureau of Investigation (NBI) 7 nakurat sa tinguha sa Public Attorney’s Office (PAO) nga mohimog linain nga imbestigasyon sa linuog nga pagpatay sa 16 anyos nga dalaga sa Siyudad sa Lapu-lapu.
Kining pagpanginlabot sa PAO gihulagway sa NBI nga makasamok na hinuon sa nasugdan nila nga imbestigasyon.
Nakasaway ang PAO sa ilang giingon nga pagdali-dali sa NBI sa pagpasakag kaso batok sa 17 anyos nga prime suspect bisan sa ilang pagtuo wa pay lig-on nga ebidensya ang ahensya.
Plano sa PAO nga ipa re-autopsy ang lawas ni Silawan sa ilang medico legal officer aron matino kon nalugosan ba o wala.
Kini nakapakurat sa director sa NBI 7, manlalaban Tomas Enrile, sanglit sa iyang tan-aw naa na sila sa saktong direksyon sa kaso.
WA DALIA
Matod ni Enrile nga wa nila gidali-dali ang pagpasakag kaso sa suspek.
Sa wa pa nila ipasaka ang kasong murder niadtong Lunes sa hapon sa korte, aduna na silay circumstantial, physical ug testimonial evidence nga nakuha.
Ang tanang mga ebidensya nagtumbok sa 17 anyos nga maoy naghimo sa krimen, matod ni Enrile.
Lakip sa gi kwestyon ni PAO chief, Persida Rueda-Acosta, ang resulta sa autopsy nga posibling wa malugos si Silawan tungod kay wa silay nakita nga sinyales nga kini gipahimuslan.
Gipasabot ni Enrile nga ang PNP Crime Laboratory ang nihatag kanilag impormasyon ug wa usab ang resulta nga magmatuod nga nahilabtan ang pagka babaye ni Silawan.
Awhag niya sa PAO officials nga ang labing maayo nilang buhaton mao ang pagpakigtagbo sa medico legal officer sa Philippine National Police (PNP) aron mahusay ang ilang mga pangutana labot sa maong isyu.
“Kami supposed to be ang PNP at saka ang NBI nag-imbestiga kaya. Ang PAO, ano ba ang mandate nila? As far as the findings of the PNP and the NBI, wala kaming problema dahil ina-adopt namin kung anong findings ng PNP medico legal,” matod ni Enrile.
Dako ang posibilidad nga kon mosulod ang PAO sa imbestigasyon, malubog na hinuon ang kaso, matod sa opisyal.
ILUBONG KARON
Karong adlawa, ilubong na si Silawan human sa duha ka semanang paghaya kaniya.
Mga alas 12 sa udto igikan sa ilang balay ang haya nga dad-on sa Santo Nino Parish sa Barangay Mactan. Ipahigayon ang misa sa alas 12:15 sa udto.
Human sa misa dad-on ang haya ngadto sa Cattleya Memorial Park sa lungsod sa Cordova, diin ilubong si Silawan.
Gipaabot nga gatusan ka mga classmate, schoolmate, higala, kauban ni Christine sa simbahan ingon man barangay o city officials ang mohatod sa lubong. (AYB, dugang taho ni FVQ)