GATUSAN ka mga Dabawenyos ang sayong mibangon ug nakijoin sa Alaska Fortified Family Run, Marso 22, sa People’s Park, Palma Gil Street, dakbayan sa Davao.
Suma pa ni Joemar Tan, usa sa organizer sa Alaska Family Run, nga ang aktibidad nagsugod alas singko sa buntag ug nahuman alas syete-traynta sa buntag.
Gipahigayon ang programa alang sa paglambo sa maayong panglawas sa matag miyembro sa pamilya.
Gihimo sab ang family fun run, aron makatabang ug mapakaon ang napili nga usa ka gatos nga estudyante gikan Vicente Hizon Sr. Elementary School, sa Lanang ning siyudad.
Nagsugod ang lumba dagan gikan People’s Park, padulong Palma Gil St., sunod Quirino Avenue, Sta. Ana Avenue, miagi sa Pinnacle Hotel ug pabalik sa People’s Park.
Ang Family Run natunga sa duha ka kategoriya: usa ka kilometro (1K) ug ang usa tulo ka kilometro (3K).
Midaug sa 1k category sila: Bellie Molino (Male Category) nga midagan sud sa 3:10.
Sa Female Category sa 1k midaug si Angelica Villanueva, mioras og 3:49 samtang sa Family Category ang pamilyang Artos nga gilangkuban nila Armando (amahan), Edwina (inahan), ug mga anak nga sila Jenny ug Jeniev, mitapos sud sa 12:02
Midaug sa 3k male category mao si Fritz Lantaco (9:05); sa 3k female category si Dianna Mae Memoracion (11:33).
Samtang sa 3k Family Category nanguna ang pamilyang Luardo nila Carlo (amahan), Neizel Mae (inahan), ug mga bagets nga sila Carl ug Princess Niña Luardo sulod sa baynte-tres minutos.
Sigun sa magtiayong Armando ug Edwina Artos, ang sikreto sa pagdaug mao ang pagtinabangay sa usa’g-usa ug pag-enjoy sa dula kauban ang miyembro sa pamilya. (Michelle Bairulla ug Jan Mariel Morcillos, USEP interns)