MAAYONG adlaw, higala! Unta kitang tanan malipayon karong adlawa luyo sa pagsungog sa mga yawa ug mga nasipyat natong mga tinguha.
Dinhi sa kalibutan, tinguha natong malipay apan sa mga kasakit- dili gayud kita kalikay.
Akong friend nga si Malen, gipahimuslan sa iyang boypren mao ningsulay og tomboy. Sulod sa tulo ka tuig nilang pag-inuwagay ESTE “mahalay” kuno- nasakpang dunay bag-ong ginaukoy ang tomboy.
Ang mas sakit kaniya - ang gipuli purya kay di masabtan iyang hitsura (mora’g bugas nga naay nawong o nawong nga puro bugas).
Bitaw, tungod dili malikayan ang mga kasakit ning kalibutan, pagasugdan nato’g buhat sa mga kaayohan aron mas mahinungdanon ang atong kinabuhi ug mapasidunggan ang Kahitas-an.
Dali ba mo masuko o saputon sama nako? Hinungdan kini nga mas gipili nakong magpuyo sa balay kay inig sa gawas basi’g daghan ko’g makalalis o makaaway. Dili ko palaaway ha? Dili lang gayud ko gusto’g mga tinunto. Masuko ko kung samuksamokon sa uban ilabi na kung akong oras sayangan lamang.
Kana god naa moy sabot (meeting o bisan unsang mahinungdanong lakaw) unya dili mopahibalo nga dili modayon ang kasabot nimo - makasapot god ay. Sa uban mora’g okay ra apan sa klarong istorya - binastos na bah! Dawaton nato nga ang “kalimot walay gahum” mao kung kini mahitabo - magpahibalo dayon aron dili maapektohan ang kinabuhi sa uban nga naningkamot pod og ilaha dinhi sa kalibutan.
Likayan nato ang mga matang nga makasapot kay dili maayo ang epekto niini kanato. Gani ang Bibilya sa Epeso 4:26 nagkanayon nga dili magpakasala sa dihang malagot kita. Unya inig lagot kay kasagaran baya dili mapugngan moyawyaw ang atong mga baba! Makapamalikas pa gani, no?
Ang mga pagtuon sa sikolohiya nagsugyot nga sa dihang kita malagot- pilion natong magpakalma. Ginhawa kita’g lalom unya ihap og uno hangtud diyes, migo, aron atong dughan dili mobuto.
Mubo ra man god ang kinabuhi, ug anugon kung sa kalagot lang kini magasto. Worst, kung sa kalagot nato kita hinuon ang atakihon o makombulsyon unya diretso hayaon. Mahasol na hinuon ang kadaghanan. Kalma lang ta ha ug pilion ang magmaya kay matud pa sa panultihon, “pildi ang maglagot,” igsuon.