WALA nagpaapekto si Kevin Durant taliwala sa kamatayon sa iyang suod nga higala aron tabangan ang host Golden State Warriors sa pagmakmak sa Indiana Pacers, 112-89, kagahapon sa National Basketball Association (NBA).
Sa wala pa nagsugod ang duwa, nasayran ni Durant nga ang iyang kababata nga si Cliff Dixon gipusil-patay sa Atlanta apan bisan pa niini, ang kanhi MVP nakatampo gihapon og 15 puntos, unom ka assists ug tulo ka block shots.
Si Dixon, kinsa gikonsiderar ni Durant nga half-brother, suod sab nga higala sa laing sakop sa Warriors nga si pointguard Quinn Cook gumikan kay pulos kini sila gikan sa Washington D.C./Maryland.
Si DeMarcus Cousins, kinsa mao pa lang ang pagbalik human kini wala nakapakita og aksyon sa miaging duha ka mga duwa sa Warriors tungod sa angol sa tiil niini, nagpakatap og 19 puntos aron pangulohan ang kadaugan.
Balanseng ataki ang gigamit sa Warriors ning kombatiha aron dominahon ang Pacers pagsugod sa 2nd quarter.
Si Klay Thompson nidugang og 18 puntos alang sa Warriors, nihatag og 15 puntos si Stephen Curry, niamot og 11 puntos si Andre Iguodala samtang nitunol og 10 puntos si Draymond Green.
“Tonight I thought our spirit and our energy were fantastic,” matod ni Warriors coach Steve Kerr.
Sa kadaugan, napahugtan sa Warriors ang ilang paggunit sa liderato sa Western Conference dala ang 49-22 nga rekord.
Ang Pacers, nga natagak sa 44-29 nga baraha ug kasamtangang naa sa ikaupat nga dapit sa Eastern Conference, gipangulohan ni Tyreke Evans pinaagi sa iyang 20 puntos samtang niamot og 18 puntos si Thaddeus Young.
Si Andrew Bogut gihangop sa mga tumatan-aw sa Oracle Arena sa labing una niyang home gikan sa iyang pagbalik sa Warriors ning bag-uhay lang.
Nagduwa si Bogut sa Warriors dihang naangkon sa team ang titulo niadtong 2015 ug niadtong 2016 dihang gikulit sa team ang makasaysayong 73 ka mga daog sa regular season.
“In my old age you get a bit sentimental. It’s funny how life works, right?” matod sa 7-footer nga si Bogut, kinsa niamot og upat ka mga puntos alang sa kadaugan.
Sa video highlights, gipakita sa big screen ang nakasuwat nga “Welcome back Andrew Bogut.”
Bisan nahimsog na’g balik si Cousins, gipasabot ni Kerr nga ilaha gihapong magamit og insakto si Bogut sa ilawom nga bahin sa pagpadayon sa ilang kampanya alang sa talagsaong Three-Peat nga kalampusan.
“I think our fans recognize that, in many ways, Andrew represented the shift in the Warriors organization and its emphasis on defense,” pasabot ni Kerr. (AP, ESL)