MOABOT sa 10,000 ka mga batan-on ang mosalmot sa 2019 Summer Grassroots Sports Training Program nga gipasiugdahan sa Cebu City Sports Commission (CCSC).
Ang kalihukan, nga suportado sa Philippine Sports Commission (PSC) ug Department of Education, mosugod karong Abril 10 sa nagkadaiyang venues sa dakbayan sa Sugbo.
Nagkanayon si CCSC chairman Edward Hayco nga alang ang kalihukan alang sa mga atleta nag-edad og unom ngadto sa 18 anyos.
Ang batan-ong mga atleta makapili sa 20 ka sporting events nga gusto nilang kat-unon og maayo.
Ang sporting events nga apil sa programa mao ang archery, basketball, air rifle, arnis, badminton, beach volleyball, boxing, chess, muay thai, dance sports, futsal, karatedo, lawn tennis, pencak silat, scrabble, sepak takraw, softball/baseball, table tennis, taekwondo, tough rugby, track and field, indoor volleyball, weightlifting, wushu ug gymnastics.
Ang programa, nga libre alang sa mga interesado, molanat og usa ka buwan diin ipahigayon ang panapos nga kalihukan niini karong Mayo 10 sa Cebu City Sports Center.
Ang trainers sa kalihukan mao ang volunteer coaches ug mga atleta nga nakaduwa na sa nagkadaiyang regional ug national sporting meet.
Gamiton nga venues sa north district mao ang City Central School Quad, Hipodromo Elementary School, Lahug Elementary School, Mabolo Elementary School, Tejero Elementary School, Zapatera Elementary School, Barrio Luz Elementary School ug Talamban Elementary School.
Samtang sa south district mao ang Don Vicente Rama Memorial Elementary School, Pardo Elementary School, Mambaling Elementary School, Labangon Elementary School, Punta Princesa Elementary School, Guadalupe Elementary School, Inayawan Elementary School, San Nicolas Elementary School, Cebu City Sports Institute, Oppra Elementary School and Tisa Elementary School. (RSC, ESL)