BANIOG nga daghang establisamento ang gipasirhan ni Mayor Tomas Osmeña silbing pagpanglutos. Natakdan si Mayor Luigi Quisumbing nga makapahugno sa mga negosyante nga nakabobo na og pohonan. Dili sila business friendly. Nalimtan nila nga ang mga magpapatigayon maoy makinarya sa ekonomikanhong pagtubo. Pwede raman god pabayron og penalty kon dunay kalapasan o kaha usbon ang kontrata kay dili na mohaom sa pagkakaron aron dili moislag.
Gipasirhan ni Quisumbing ang Club Hatchi ug Central Bar and Lounge nga nagpasiugdag kalihokan atol sa sinulog nga walay permiso. Giingong gipanag-iya sa iyang iyaan nga maoy nakapasuko sa apohan nga si NQ nga gani gikataho nga tua na mosuporta ni Rep. Jonas Cortes nga mobalik pagka-mayor. Gipasirhan usab ang MO2 Restobar sa Mantawi Drive gumikan sa kapakyas paglukat og business permit. Gidungan pagpatak-op ang Big Hotel, Big Hotel Suites ug Linear Coffee Shop sa Mantawi Drive, Tipolo nga napakyas pagpa-renew sa ilang business permit gikan sa 2018. Nasilag ang 150 ka mga trabahanti nga nakulban sa panginabuhi nga napagan sa pamolitika ni Quisumbing. Subo usab nga palandongon nga ang tulo ka mga establisamento naigo sa hugaw, walay kasing-kasing ug yawan-ong kamot sa maginukdanon nga politiko.
Sa 2007 ang Katumanan Hardware maoy orihinal nga nag-abang sa luna nga iya sa Mandaue sulod sa 15 ka tuig kansang kontrata giratipikahan sa konseho. Sa 2012 ang Katumanan misulod og laing kontrata tali sa Mandaue nga dugang 25 ka tuig. Giabli ni Cortes ang kahigayonan nga mahimong lagsik sa patigayon ang maong dapit aron molambo ug daghang makatrabaho. Naa sa contract of lease nga pwede itakli sa kauban o affiliate nga mao ra gihapon ang mga board of directors. Maong sa 2013 gipa-sublease sa Katumanan ngadto sa Cenore Corp. nga kauban o affiliate nga mipatukod sa Big Hotel, Big Hotel Suites ug Linear Coffee Shop ubos sa Travelbee Management. Mihatag sa deed of assignment ang Katumanan ngadto sa Cenore pinirnahan ni Cortes. Tungod sa politikanhong pagpanglutos sa 2018 gipakanselar ni Quisumbing ang kontrata tali sa Katumanan ug Cenore sa rason nga alkansi ang Mandaue ingon man walay authority gikan sa konseho nunot sa awhag sa Cenore nga direktang mokontrata sa Mandaue. Ang luna lagi sa Looc gipaabangan man ni Quisumbing og 75 sentabos matag metro kwadrado sa San Miguel Corp.
Sa legal nga interpretasyon wala na kinahanglana ang pagpananghid sa konseho kay giratipikahan naman sa unang kontrata tali sa Katumanan ug Mandaue. Apan gumikan gihapon sa bulok sa politika gipasakahan ni Quisumbing og graft charges ang pito ka mga konsehal nga kaalyado ni Cortes. (csa_1156@yahoo.com/09064648954)