Editoryal: Siguridad sa publiko

Editorial cartoon by Ariel Itumay
Editorial cartoon by Ariel Itumay

KINING pagpusil-patay ni SPO2 Frances Allen Villamor nga mismo sulod sa edipisyo sa Hall of Justice sa dakbayan sa Danao naghatag kini og dugang timaan nga karong panahona wala nay girespetuhan ug wa na usay gipili nga dapit ang mga kriminal nga mohimo sa salaodnong binuhatan.

Si Villamor nga gikan pa lang sa korte tungod sa usa ka hearing sa iyang kaso kalabot sa gidiling drugas, wa pa gani makagawas sa building, ang gisugat ug gipusil-patay sa mamumuno nga nagtaptap sa iyang nawong.

Kini nahitabo udtong tutok ug diha gyud sa pultahan sa Hall Of Justice diin pipila ka higayon siya gibalikbalikan sa pagpusil ug diha-diha patay gilayon.

Niadtong Pebrero 19, 2018, si Atty. Jonah John Ungab, gikan usab sa hearing sa iyang kliyente nga giilang drug lord nga si Kerwin Espinosa, ang gibanhigan sa mga wa mailhing suspetsado sa may S. Osmena Street, dakbayan sa Sugbo.

Kini nahitabo usab udtong tutok atubangan sa asawa ni Ungab nga kuyog kaniya niadtong higayona.

Midangat og pipila lang ka buwan, ang uyoan ni Ungab nga si Mayor Mariano Blanco sa lungsod sa Ronda ang gisulod usab sa way kahadlok nga mga suspetsado diha mismo sa iyang buhatan ug didto gipusil patay.

Kini nahitabo kadlawon sa Septiyembre 4, 2018.

Si Blanco maoy usa sa nahinganlan ni Presidente Rodrigo Duterte niadtong 2016 nga may kalambigitan sa gidiling drugas.

Ang mga nahisgutan sa unahan, maoy pipila lang sa mga high profile cases nga naghulagway sa pagkagusbat sa siguridad sa publiko.

Wala nay kahadlok ang mga kriminal nga mopatay bisan unsang orasa ug sa bisan asa nga dapit.

Ang nakapasamot kay way bisan anino na lang sa hustisya nga migimaw hangtod karon.

Kini maoy dakong hulga sa publiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph