GIKATAKDANG aduna na unyay alibyo ang kasamtangang kahuot sa dagan sa trapiko sa Metro Cebu nga masinati sa mga sumasakay gikan ug paingon sa amihanang bahin sa Sugbo.
Kini human pormal na nga gipahigayon ang groundbreaking ceremony sa tukurong pantalan sa Poblacion, lungsod sa Lilo-an nga dumalaon sa Pier 88 Ventures, Inc. ug Topline Group of Companies.
Si Davao City Mayor Sara Duterte-Carpio maoy dinapit sa naasoy nga kalihukan uban sa mga opisyal sa lungsod nga gipangulohan ni Mayor Christina Garcia Frasco kagahapon, Biyernes, Marso 22.
Ang pantalan humanon sulod sa 9 ngadto sa 12 ka buwan nga magsilbing dunggoanan sa ferry boat nga magbiyahiann sa Barangay Ibo sa dakbayan sa Lapu-Lapu ug sa Pier 3 sa dakbayan sa Sugbo.
Ang taga amihanang Sugbo di na kinahanglang moagi sa naandang national highway sa Lilo-an paingon sa dakbayan sa Mandaue aron makaabot sa Lapu-Lapu ug Cebu City.
Pinaagi sa ferry boat gikatakdang molanat na lang og 35 minutos ang pagbiyahe gikan sa Lilo-an paingon sa Lapu-Lapu samtang 45 minutos paingon sa dakbayan sa Sugbo inay dul-an sa duha ka oras sa public utility jeepney (PUJ) kon grabeng traffic.
Matod ni Eugene Erik Lim ang CEO sa Topline nga mokabat sa 200 Milyones pesos ang gasto nila sa pagpabarog sa naasoyng pantalan sa mosubra sa 10,000 square meters nga luna.
Ang naasoyng luna gipanag-iya sa simbahan ug gipaabangan kanila sud sa 30 ka tuig.
Gawas sa ferry boat bukas usab unya ang naasoyng pantalan sa mga RoRo vessel nga mokarga ug dagkong mga truck nga mobiyahe paingon sa ubang dapit sa amihanang Sugbo. (GCM)