NAA sa listahan sa mga pulis nga nalambigit sa illegal drugs ni Presidente Rodrigo Duterte ang pulis nga taga Dakbayan sa Danao nga gipusil patay niadtong Huwebes sa buntag.
Matod ni Supt. Eloveo Marquez, information officer sa Cebu Provincial Police Office (CPPO), nabalhin si SPO2 Francis Alen Villamo sa Autonomous Region in Muslim Mindanao (ARMM) tungod niini.
Busa, usa sa ilang gisusi nga anggulo mao ang kalambigitan niini sa illegal drugs.
Lakip sa ilang gitan-aw ang mga kaso nga gitambungan niini sa wa pa siya patya nga mao ang illegal drugs ug ilegal nga paghupot og armas.
Si Villamor nitambong sa kaso sa illegal drugs batok kang Julius Ceasar Macoto ug illegal possession of firearms ni Gerson Enriquez sa wa pa siya patya sud sa Hall of Justice sa Dakbayan sa Danao.
Kining mga tawhana nasikop ni Villamor dihang sakop pa siya sa Provincial Intelligence Branch (PIB).
“Sa pagkakaron, kay wala pa man sad mahuman ang ilang (Danao City police) investigation, so, dili nato mahatag ang unsay saktong motibo but we are looking into angles kon unsay mga posible, apil na ani nga kaso nga iyang gihuptan,” matod ni Marquez.
Lakip sa ilang ipasusi ang security nga gipatuman sa building sa Regional Trial Court sa Danao kay nganong nakasulod ang mga armadong tawo nga wa mamatikdi.
Usa ka armadong tawo nga nagtaptap ang nipusil kang Villamor.
Dunay laing upat nga gituohang backup ang nakit-ang ningkuyog paggawas sa gunman.
Nanakay ang lima sa usa ka awto nga puti.