DUGAY tukoron, dali lumpagon. Ingon ini ang kalamposan, labi na kabahin sa pangatungdanan.

Sukad nilampos paghupot og gahom alang unta makaalagad sa katawhan kinsa’y maayong laki nga nilungtad pagtuman sa ilang saad? Pastilan, lagmit ang pagpangita’g tubag niining maong pangutana wa’y kalainan sa pagpamasin nga makatilaw og katam-is samtang gadildil og asin.

For updates from around the country, follow Sun.Star on Twitter

Kon unsa’y nakaparat sa pangagamhanan, ay, sayon ra kaayo pagtug-an. Kulismaot gyod dayon ang dagway, labi na kon ang kaatbang sa politika mao’y pangutan-on. Mobukal dayon ang laway sa pagpanaway. Modilaab ang dila sa pagtayhop ug pag-ihap sa mga sayop.

Bitaw, ingon ini ang pagpainit sa dunggan sa mga tigpaminaw atol sa tinuhikay tali sa mga kandidato hangtod sa adlaw sa piniliay.

Pananglitan, bisan dugay nang gapataas sa iyang tapay si Mayor Tomas Osmeña diha sa City Hall, dali gihapon siyang labokan sa iyang mga kaaway. Sayon-sayonon ra gihapon siya pagtiurok bisan tuod gituboy siya sa dakbayan nga mao’y labing kasaligan nga magdumala sa City Hall.

Usa sa kusog mokupog kang Osmeña mao ang iyang kasangka sa pagkakongresista karong umaabot Mayo. Kon ang putak-putak ni Jonathan Guardo mao’y paminawon, pakyas kuno ang pangagamhanan ni Osmeña. Kuwang ra kuno ang pagtagad sa mayor alang sa limpyo ug luwas nga dakbayan.

“Garbage is all over, streets are dim and dirty…” bagutbot pa niya sumala pa sa gikataho: “Guardo called on the mayor to allocate bigger funds for dengue and to buy more fire trucks.”

Bisan pa’g wa nibawos si Osmeña pag-ingon nga gapatuyang lang ug wa’y bangkaagan ang mga pasangil batok niya, paltos gihapon si Guardo sa iyang pagkapolitiko.

Nilampos ra siya pagpakita nga wala siya’y santoson aron lang makalabok sa iyang kontra.

Bisan ang kamatayon sa mga biktima sa dengue ug sunog gihimo niyang latos sa kandidatora ni Osmeña aron makalabaw siya’g puntos. Kon unsa ma’y kakuwang sa mayor, sobra na pod kon pakasad-on siya sa gidangatan sa mga gipang-dengue ug napaig sa sunog. Kay kining mga katalagman dili man ni pagbuot sa mayor. Daghan mang hinungdan nganong nahitabo ni, ug dili makiangayon kon idan-ok lang sa mayor ang pagtulisok.

Kutob ra sa pangagpas nga wala’y dengue ug sunog nga mahitabo kon si Guardo ug bisan kinsa sa mga kaatbang ni Osmeña mao’y magdumala sa City Hall.

Labing maayo unta kon ang mga sugyot ni Gurado kabahin sa pagpahamtang sa katilingbanong kaayohan kanang wala pa mahibaw-i ni Osmeña. Labing maayo kon ang iyang ipatin-aw duna’y igong tumong labaw sa naandang laraw paglumpag sa kadungganan sa mayor.

Sa iyang pagsulod sa politika, sama ra nga gipahimutang ni Guardo ang iyang kaugalingon sa usa ka balay nga bildo. Kon buot siya’g binatohay, maayo tingali nga patas-an pa niya iyang lupad pinasikad sa plataporma. Kuyaw maunay siya sa kaugalingong tari kon paubsan ug angay ra sa buwangan ang iyang pagpanghasi.

(geemyko@gmail.com)