NIAWHAG si Lipa Archbishop Ramon Arguelles nga butangan og warning ang mga condom sama sa pahimangno sa mga sigarilyo.
Matod pa ni Argulles, kon ang mga sigarilyo dunay warning nga “Smoking Is Dangerous For Your Health,” angay sab nga butangan og warning ang condom nga “Condoms May Fail to Protect You From Aids.”
Asa man kaha ibutang ang warning?
Okay lang kon diha sa pakete sa condom. Kon adto gani ibutang sa condom gyud, awahi na kaayo ang tanan unya wa pa gyuy mobasa.
***
Matod ni Bishop Arguelles, ang condom pakyas balig 38 porsento sa pagpugong sa pagmabdos.
Unsa pa kaha sa paglikay sa Aids?
Mao bitaw nga nitumaw kanang pangutana kon unsay kalainan sa condom ug sa parachute.
Nakahibawo na mo sa tubag. Kon mabuslot ang parachute, patay ang tawo. Kon mabuslot ang condom, buhi ang tawo.
**
Nituyhakaw og balik ang isyu sa condom sa dihang nanghatag og libreng condom ang Department of Health (DOH) didto sa kaulohan aron sa pagpugong sa pagkuyanap sa Aids.
Hugtanon kining gisupak sa Simbahang Katoliko kay usa kini ka matang sa artificial contraceptives o paagi sa pagpugong sa pagsabak.
Ang mga opisyales sa DOH niingon nga ang ilang tuyo mao lang ang paglikay sa Aids nga hangtod karon wa pay kaayohan.
Angay tingaling aninawon og pag-ayo sa Simbahan kon ang ilang hugtanong pagsupak sa condom kay makapugong sa pagkahulma sa usa ka tawo, moresulta na hinuon sa kamatayon sa usa ka tawo.
**
Dunay bag-ong survey nga nagpakita nga nag-una si Senador Manny Villar sa tanang mga kandidato sa pagka-presidente – nag-una siya sa gidaghanon sa mga advertisement sa radio ug telebisyon ingon man sa mga posters. Bisan ang labing lagyong lugar dunay mga posters ni Villar.
Gani, si kanhi Bukidnon Rep. Nereus Acosta, kandidato sa pagkasenador sa Liberal Party, niingon nga hastang mga kabataang Higaonon, mga lumad sa kabukiran sa Bukidnon, nanagkanta na sa jingle ni Villar nga “Naligo ka na ba sa dagat ng basura.”
Liwas sa eleksyon, madugangan pa gyud ang mga basura sa mga posters ni Villar ug sa ubang mga kandidato.
***
Gitugtan sa hukmanan nga makapyansa sila si Senador Antonio Trillanes IV ug si Brig. Gen. Danilo Lim, kandidato sa pagkasenador.
Ang duha detenido kay nag-atubang sa kasong rebelyon tungod sa ilang pagsakop sa The Penisula Manila hotel tulo ka tuig na ang milabay.
Pero di pa buhian si Trillanes tungod sa nagpadayong court martial batok kaniya sa 2003 Oakwood mutiny.
Si Trillanes maoy labing dakog travel expenses sa tanang mga senador bisan tua siya sa sud sa bilanggoan.
Unsa kaha no kon makagawas ni siya?
r