SECTIONS
Saturday, August 24, 2019
PAMPANGA

Garcia: Ing dalan ning Kurus, 3 (Passages of the Cross)

Kapisik

ING Kawalung Delanan ning Kurus: Akatagmu na lang Kristo ding Kababaynan ning Yerusalem

Keraklan o manga walu karing apulu kareng kababaynan malambut la pusu nung iyambing la karing kalalakyan inya sa’t deng mekitagmu at linapit kang Kristo inyang mamusan yang kurus karing dalan ning Yerusalem papunta king Golgota ila pin kababaynan. Melunus la at magpanganis king ikit dang kabilyan na ning karelang talaturu. Mekad menangis la naman uli ning balu dang ala yang sala nanu man keng pangayatul at pangaparusa kaya. Ninu mong e mangilag kakatamu nung ing kakaluguran tamu miyatulan yang kamatayan uli niti.

Ing Kasyam a Delanan ning Kurus: Ing Katlung Pangasakab nang Kristo

Pasibayu, pepakit nang Ginung Yesukristo ing keynan na anting metung a mibait at mikatawang tau. Anti ya mu naman kekatamung makidaya at laman inya sa’t makaramdam yang sakit, kaplas at pagal kalupa tamu. Alang nanu mang pamiyaliwa kekatamu anting tau subali king keyang dalise lugud a alang panayang kapalit king nanu mang suyung makatagulaling king keyang Pakamalang Ibpa.

Nung bisa ya mu pin, malyari yang sari kasikan at ing kurus mengari ya mung singkayan na ning pakpak ning ayup inya sa’t agyang king metung nang kalingkingan malyari neng ibwat iti, dapot e ya mignasang gamitan na ing sikanan at upaya nang likas uli ning buri nang ipakit kekatamu ing metung a lusuk kayumung pamanyuyu nang kisnang lugud king Ibpa ba’na takamung turwanan nung makananung makauli king kayaryan ning Dyos.

Ing Kapulung Delanan ning Kurus: Ing Pangalubas na Imalan nang Kristo

Ala nang lakwas pang makarine king metung a tau king pangalubas na king arapan da ring malda at maglakad ya king dalan alang nanu mang imalan a susulud. Dapot iti tinggap nang alang nanu mang pamanisding o pamaglaban karing dinapat kaya kaniti. Kamatutwanan, penyad no pang kapatawaran bayu ne likwan ing kayang katawan kaybat nang migkasakit king pangapaku na king kurus.

Lantaran yang makapakung alang nanu mang imalan a makatakap king katawan na bista man karing larawan a akakit tamu e antita uli ping e manayun ing kabilyan a antita ninu man ing kapalyaryan. Maragul a kalapastanganan king metung a dalise lulugud king Dyos ing depatan da kaya. E pa makagyu karela ing pinaku de king kurus, pinaku de pang lubusang lubas arapan ding asna karakal a manakit.

Ing Kalabingmetung a Delanan ning Kurus: Ing Pangapaku na king Kurus Kristo

Anting metung a mikasala king batas--mipaku ya king kurus i Kristong mayumu king pilubluban--na pauli ning iti dake ning kayang parasan king pamanipa na keti king yatu. Petawaran ne pa at pekisabi king Ibpa ba’neng atuki iti king kayaryan na kabud mapatad la inawa. Ita sumangid ning metung a abe dang mipaku mu naman. I Dimas ing penyawad nang tawad uli ning pepakit nang kababan lub at pamanyawad tawad. Ing metung naman a i Yestas, pitaru-taru ne pa i Kristo at yigyagan neng iligtas na la at ing sarili na king pangapaku king kurus nung kanung tutwanan yang ating karapatan

***

Dake Talabaldugan:

gilid – (palagyu) lele, bebe, talingdiking. English: border, edge, rim, side, margin. Alimbawa king pamangamit: “Misane na kung keng gilid ning pisamban mamulandit balang abak inya agyang makapyak ku makapulandit ku pa mu rin e ku mitutomba.”

giling – (palagyu) pamangiling, pamanggiling, kabyo, kiskis. English: grinding, milling. Alimbawa king pamangamit: “Mura mu ing giling keng pale king Bukawe uling dakal lang siping-siping a manggiling a konu karin.”

gilinggilingan – (palagyu) pyalung da reng anak keng dalan kanitang minuna dapot e pa binang malambat a panaun. English: a street game wherein kids form themselves into a circle and gets eliminated one by one as each one loses and the remaining one becomes the winner. Alimbawa king pamangamit: “E ku pa akalingwan ing pyalung mi kanitang gilinggilingan a nung nu maralas kung mitagan at manyambut.”

gilít¹ – (palagyu) gili, pirasung malati gamit ing pataram, kate lati-lati. English: sliced or cut piece of anything, especially foodstuff. Alimbawa king pamangamit: “Pekakamal na ing pamisali nang gilit a kalame tibag Didi inya pin e na apagisan uling alang bisang sali.”

gilít² – (palagyu) gilit, garlit, kadlit. English: incision, cut, slice. Alimbawa king pamangamit: “Pepaburyan ne ning lalaki ing gilit keng gamat na inya e ne mipaldan agyang pabanwa ne pangasugat.

***

Gawing Mekalingwan Ding Kapampangan

Kanitang mengalabas a pulumbanwa a e ya pa memakbung ing Pinatubu--neng panaun ning kaleldo anti’ti—deng tau pupupul na la e mu kabud pale, nung e pati na singkamas at bungang tanaman a makayusu antimo reng kaymitu, singkamas, byabas, sampaluk a malulut o malasebu na, manggang dinamulag at piku.

Deng mang pakwan at milun kanita pota mung kaleldo la mapupupul. Ngeni, mipaparanun la inya neng kaleldo ala na kang asali kareti. Mipamye la mu pin kanita reng siping-siping bale uling asno karakal a pupul. Ala mang mamisali uling ila ngan makapupul la subali mu kareng lalabas a dayu. Masakit nang mibalik ing antita uling megisan na la ring dayat at miyalilan na la ngan palsdan alus.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph