Diola: Pailob

Fr. Carmelo Diola

Binasi sa Exodo 3:1-8, 13-15; Salmo 103; 1 Taga-Corinto 10:1-6, 10-12; Lucas 13:1-9

MAGHISGOT na gani og pailob mosuntop dayon sa akong panumdoman ang akong mga ginikanan ilabina sa mga tuig 1970. Niining mga tuiga nagsugod, ug nagsunodsunod, og tungha kami sa kolehiya. Upat ming lalaki isip “batch one”. Ang ikaduhang “batch” duha ka babaye ug duha ka lalaki. Niadtong mga panahona ang negosyo sa among ginikanan, nga naglakip og pagpangutang sa usa ka ahensiya sa gobyerno, hinay kaayo.

Morag usa ka “internal” OFW ang among amahan kay usahay pila ka bulan siyang maghulat sa Manila didto sa usa ka ahensiya sa gobyerno. Dako ang iyang pailob samtang naghulat nga maaprobahan ang ilang pundo sa usa ka “housing project”. Naghulat pod diay ang pipila ka trabahante sa gobyerno sa ilang pahalipay. Mao nga nadugay kay walay gihatag ang akong amahan. Hinumdom pa gyod ko sa yugto nga mapasigarbohong gipakita sa akong amahan kanako ang checke nga mikabat sa usa ka gatos ka libo ka peso.

Lisod tugkaron kining pailob sa Ginoo ngari kanato kay wala baya siyay paabuton gikan kanato. Ni materyal nga pahalipay alang kaniya ni gahom kay hingpit na man ang Dios. May duha ka trahedya nga gihisgotan sa ebanghelyo. Mga tawo kini nga gipatay o nangamatay. Naghunahuna ang mga tigpaminaw ni Jesus nga nahitabo kini kanila kay makasasala man kining mga tawhana. Ang punto ni Jesus mao nga mahitabo kini nila kon dili sila maghinulsol. Mipaambit dayon si Jesus og usa ka sambingay mahitungod sa kahoyng Igera nga di makapamunga.

Buot kining ipaputol sa agalon apan miingon ang tig-alima kaniya: “Agalon, pasagdi una kini niining tuiga, hangtod sa panahon nga makakalot ako sa palibot niini ug maabunohan og tai; ug basig pa og mamunga kini sa umaabot. Kondili man gani, mahimo na nga putlon kini”. Ang pailob sa Dios diay alang sa atong pagkakabig ug pagbalik ngadto sa Dios. Tagaag “chance”.

Edad-edaran na si Moises sa dihang nadawat niya ang iyang misyon gikan sa Dios pinaagi sa nagdilaab nga sampinit nga wala masunog. Sa batan-on pa ni si Moises init nig ulo. Gani nakapatay siya. Wa siyay pailog. Sa pagtagbo niya sa Ginoo diha sa sampinit nga nagdilaab, gitudloan siyag pailog. Gikan sa pagkasinagop nga anak sa anak sa Paraon, nahimong siyang usa ka magbalantay sa karnero. Usa siya makaduol sa maong talan-awon, gipahubo usa siya sa iyang sandalyas. Dili siya makadalidali kay kinahanglan siyang mohulat sa Dios.

Gipahinumdoman ni Pablo ang mga taga-Corinto nga daghan sa mga Israelita nalaglag sa kamingawan. “Kining tanan mga pasidaan kanato aron dili kita magtinguhag dautang mga butang ingon sa ilang gihimo”. Mapailobon ang Dios ug ang iyang pailob alang sa atong kaluwasan.

“Pagdali diha sa paghinayhinay,” sumala pa sa usa ka prinsipyo sa pagpuyo sa panahon sa Kuwaresma. Walay lain og pagbaton og pailob kondili pinaagi sa paghinayhinay. Unsa may atong mabuhat aron makabaton kita og pailob?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph