BELIB na unta ko sa pamahayag ni Bise Mayor Edgar Labella dihang niingon siya human sa indoor rally sa Hugpong ng Pagbabago (HnP) nga wa kinahanglana ang pag-isa sa kamot kay nianhi si Davao Mayor Inday Sara alang sa mga HnP senatorial candidates.
Buot ipasabot, klaro nga nagsalig ang HnP sa local nga Partido Barug. Dili ang HnP nga moagak sa grupo ni Labella aron makabarug. Lig-on gyud diay ang iyang team.
Apan unsa bang pagka unsaa nga daw gitulon man ni Labella ang iyang gipamulong dihang nigukod kini sa presidential daughter aron magpaisa diay. Gawas nga moguwa nga huyang diay ug dili lig-on, asa na man ang pagkaligdong sa iyang gipamahayag?
Kon duna may brayt nga nakatambag niyang kinahanglan ang pag-isa sa kamot, wa na lang unta siya patinguga atubangan sa mga sakop sa media aron mopalusot ngano wa giisa sa stage. Total, iya mang gukdon si Inday Sara diay.
Karon, mangutana na sab ko nganong wa gikuyog ni Labella si Mike sa iyang paghangyo nga iisa ang kamot. Kon buot hunahunaon baya, si kanhi mayor Mike Rama ang nagkinahanglan sa maong endorsement.
Daw afterthought na lang ang pamahayag nga apil ang tanan sa Barug sa maong pag-isa.
Nganong nakaingon ko niini? Kay nagkinahanglan si Rama di tungod kay hinay iyang kampanya. Nagkinahanglan si Rama tungod kay naglisod og sutoy ang kampanya niya tungod sa wa pa gyuy klaro nga pagtangtang niya sa drug list sa presidente.
Bisan unsaon niyag insister nga vindicated na, nakadut na man gyud sa alimpatakan sa publiko ang gisulti ni Presidente Duterte mga duha ka tuig na nga milabay.
Nakahibawo si Rama nga ang dakong tabang nga magkatagad silag balik ni Presidente Duterte mao ang iyang ig-agaw nga si Annabelle Rama. Apan ang maong paagi wala mauyoni sa anak ug ubang suod sa kasingkasing sa presidente.
Apan, lahi unta gyud kon gibira ni Labella ang iyang running mate aron silang duha ang magpaisa sa kamot sa anak sa presidente.
CEBU ug Bohol
Apan way pagduhaduha nga nakig-alayon ang One Cebu ug Hugpong ng Pagbabago sa miaging adlaw. Buot ipasabot, ang HnP uyon sa mga local nga kandidato nga gisuportahan ni Presidente Duterte. Way bangi ang PDP-Laban ug HnP.
Apan sukwahi ang atong gilantaw nga bahitabo sa Bohol.
Si Inday Sara nisuporta sa tibuok slate nilang tinuod nga Bol-anon nga sila si kanhi Cabsec Jun Evasco ug Tommy Abapo sa Alyansang Bol-anon alang sa Kausaban (ABAKA).
Buot ipasabot nga nisukwahi siya sa slate sa PDP-Laban nga nituboy kang Kong. Art Yap ug Kong. Relampagos. Wa pa mahibaw-i kon mosuporta ba si Presidente Duterte kang Yap. @anol_cebu sa Twitter