GAWAS sa 43 ka mga pulitiko nga naa sa narcolist nga una nang gibulgar ni Presidente Rodrigo Duterte, ang Philippine Drug Enforcement Agency (PDEA) aduna usay gihuptan nga listahan sa mga huwes ug mga prosecutors ingon man mga showbiz personalities nga nahilambigit sa illegal nga drugas. Matod pa ni PDEA Director General Aaron Aquino nga adunay 13 ka mga huwes ug 10 ka mga prosecutors nga naa sa ilang listahan nga nahilambigit sa kalihukan sa illegal drugs. Wala hinuon gibutyag ni Aquino kon unsa ni sila, mga druglords ba o drug protectors.
Matod pa ni Aquino nga ila pa gyud nga i-validate ang maong listahan mao nga dili pa nila mabutyag sa publiko. Daghan nga mga showbiz personalities tiggamitan lamang labi pa aning party drugs nga ecstasy. Daghan nang taga showbiz ang nadakpan gumikan sa paggamit og illegal nga drugas.
Daghan sa mga piskal ug mga huwes ang kakunsabo sa mga drug dealers. Nasagmuyo si Aquino nga daghan sa mga kaso nga gisang-at sa korte ipang-dismiss lang sa mga piskal ug huwes gumikan kay atoa nakapusta sa mga druglords. Ang Philippine National Police (PNP) nagkanayon usab nga dugay na kining maong isyo.
Mao ni giingon ni kanhi Presidente Joseph Estrada kaniadto nga mga ‘hoodlums in robes’. Dinhi man gani sa ato, dugay na kining maong mga alegasyon nga daghang mga piskal ug huwes nga puwede rang ma-areglo sa mga drug cases. Pero way nakiha gumikan kay way ebidensiya. Puro man lang mga tabi-tabi nga adunay pipila kanila kusog kaayong modawat og suburno.
Sa unang gibutyag ni Duterte nga narco-list, dihay naapil nga mga huwes ug piskal. Ambot og unsa nay nahitabo sa listahan? Na-dismiss ba kaha kadto sila o nagpabilin pa ba sa puwesto? Mireklamo man gani ang Supreme Court niadto gumikan kay angay unta nga sila maoy midisplina sa maong mga huwes kay independente ang executive ug judiciary. Ang mga piskal hinuon nga ubos sa Department of Justice anaa ubos sa executive department. Angay sab ning i-expose uy aron masayod kita kon si kinsa kining mga piskal ug huwes. Basin naa dinhi sa ato. (bobbygnalzaro@gmail.com)