NAKURAT ang National Bureau of Investigation (NBI) 7 sa pamahayag sa Public Attorney’s Office (PAO) nga mopahigayon sila og kaugalingon nga imbestigasyon. Alang sa PAO, gidali-dali sa NBI ang ilang imbestigasyon sa pagpatay kang Christine Lee Silawan.
Apan si NBI Director Tomas Enrile niingon nga wa nila dali-dalia ang imbestigasyon kay sa wa pa nila gipasaka ang kaso, duna na silay nakuhang mga ebidensya batok sa 17 anyos nga suspek, nga alang kanila, igo ug lig-on na.
Matod ni Enrile, hayan makalawgaw na hinuon kini sa ilang imbestigasyon.
Si PAO chief Persida Rueda-Acosta nagtuo nga gidali-dali sa NBI ang pagpasaka og kaso bisan wa pay igong mga ebidensya,
Dinhi pa lang sa pasiunang dagan sa imbestigasyon, ang duha ka mga ahensya sa kagamhanan ingon sa nagkasungi na. Ang makita sa publiko, maorag sila nagkaguliyang.
Unta, sa wa pa moluwat si Acosta og pamahayag, nakigtagbo siya sa mga imbestigador sa NBI. Gitan-aw nila kon asang dapita nagkuwang ang NBI, kana kon naa man.
Usa sa wa gibutyag o matubag sa NBI ang kabahin sa usa ka Diaz nga maoy giingon ni chat kang Silawan nga sila magkita mga alas 6 sa gabii. Unsa man, naa ba sa tablet sa 17 anyos nga suspek nga siya si Diaz? Kay ingon sa inahan nga di kini account sa iyang anak.
Giunsa nila pagseguro nga ang ang 17 anyos maoy kuyog ni Silawan nga nakita sa close circuit television (CCTV) nga naglakaw sa wa pa kini patya? Tungod ba kay dunay mga saksi nga nag-ila kaniya?
Sa pagkakaron, ang nakita pa sa publiko mao ang pipila ka mga buslot sa estorya sa mga awtoridad. Nga bisan gani ang laing ahensya sa kagamhanan nagduha-duha. Kon unsa may kakuwangan sa mga ebidensya,ning sayo pa lang angay kining tapakan.
Kinahanglan sab silang magtambayayong inay mag-iyahay, aron di malawgaw.