USA ka kahibulongan sa pagkamaayo sa Diyos mao ang istorya nga atong mabasa sa Daniel kapitulo 2. Pagkamaayo kini sa Diyos tungod kay bisan pa sa hari sa Babilonia nga wala nagatuo Kaniya, Iyang gipadayag ang Iyang kabubut-on ug ang Iyang presensiya. Mao kini ang istorya.
Usa ka gabii, samtang natulog si Haring Nebuchadnezzar, nagdamgo siya nga natarog gayud ang iyang kalag kung unsa ba’y buot ipasabot atong damgoha.
Nisamot ang iyang problema kay bisa’g unsa niyang huna-huna, dili gyud niya mahinumdoman kung unsa tong iyang damgo. Nakamata siya ug dili na gayud makatulog.
Tung-tunga nianang kagab-ihon, iyang gipatawag ang iyang mga scholars aron tudloan siya kung unsa iyang damgo, ug unsay meaning ato. Ug sa dihang walay makasulti kaniya kung unsa ang iyang damgo. Sa iyang kapungot, iyang gimandoan ang iyang heneral nga pamatyon na lang ang tanang mga scholars kay wala daw mga pulos. Sa pagkonpronta sa heneral kang Daniel, si Daniel nagpasalig nga iyang matug-an ni haring Nebuchadnezzar ang iyang damgo ug ang buot ipasabot niini.
Human nag-ampo si Daniel uban sa iyang tulo ka mga higala, ug sa pagpadayag sa Diyos kaniya kadtong damgoha, niadto siya sa hari ug gisaysay ang damgo.
Ni Daniel sa hari, “Walay makatug-an kanimo sa imong damgo ug buot ipasabot niini kung dili ang Diyos lamang sa kalangitan nga maoy akong gituohan.” Naminaw pag-ayo ang hari.
“Nagdamgo ikaw, o hari, og usa ka dakung imahen o rebulto nga namugna gikan sa nagkalahi-lahi nga mga hiyasang bato. Ang ulo, bulawan; ang dughan ug mga bukton, silverio; ang hawak, bronse; ang mga paa, puthaw; ug ang mga tiil, mixlada sa puthaw ug yuta.”
Pagkadungog sa hari, nabanhaw ang iyang kalag. Nabalik sa iyang huna-huna ang iyang damgo. Nalipay pag-ayo ang hari sa pinaka-kusgang gingharian sa tibuok kalibutan nianang panahona. “Ug adunay bato gikan sa bukid nga molupad ug magaigo sa tiilian niining rebulto, ug ang tibuok rebulto mahanaw ug mapalid sa hangin.”
“O hari, mao kini ang buot ipasabot niini,” pagpadayon ni Daniel.
“Ang gisimbolohan sa ulo nga bulawan mao ikaw, o hari niining bulawanong Babilonia. Ug human sa imong gingharian, magasunod ang usa ka gingharian nga dili kaayo kusgan sama sa Babilonia. Ug pagsundan kini sa ikatulong gingharian, ug pagalutoson siya sa ikaupat nga kusgan sama sa puthaw. Unya, mabungkag kini sa napulo ka mga nagkadaiyang tribo o gingharian. Ug sa niining panahon, ang gingharian sa Diyos nga girepresentahan sa bato magaabot ug magapuli niining mga gingharian ug manglungtad hangtud sa kahangturan.”
Nalipay si Haring Nebuchadnezzar sa iyang nadunggan, ug iyang nasabtan nga ang Diyos ni Daniel maoy Diyos nga labaw sa tanan ug dapat niya simbahon.
Ang paghatag sa Diyos sa damgo ngadto sa hari nga dili tumotuo nagpahibalo kanato nga ang isyu sa pagbalik ni Jesu-Kristo alang sa tanang katawhan. Busa, ato kining imantala aron nga madawatan sa tanan.