KINI ang giingong dunay “forever” sa duha ka mag live-in-partner nga nasikop atol sa drug bust sa Panabo City sa milabay nga adlaw.
Tanggong nga nag-uban sa prisohan ang magkapuyo nga sila Donomique Pogoy ug Myka Jennyca (bansagon gitago), pulos hamtong ug residente sa Panabo City.
Sikop ang duha sa Panabo PNP atol sa gikasa nga drug bust diin sila napalitan og gituohang shabu.
Gilayong gipangposasan ang mga suspek diin ang lalaki gikonsiderang maoy top 10 sa listahan sa mga pusher sa Davao del Norte.
Sumala sa babaye nga suspek, nga bahala’g nadakpan sila basta mag-uban sila sa iyang ka-live in sud sa prisohan nga maoy ilang giingong forever.
Kasong pagsupak sa Republic Act 9165 kon Comprehensive Dangerous Drug Act of 2002 ang ipasaka nga kaso sa mga dinakpan didto sa korte. (Richy F. Nalagon)