GIOPERAHAN ang 40-anyos nga babaye human aksidente nga iyang natulon ug mibara sa tilaok ang iyang pustiso atol sa ilang panihapon alas 8:10 sa gabii niadtong Biyernes, Marso 22, sa dakbayan sa Cotabato.
Sa medical bulletin sa Cotabato Regional and Medical Center (CRMC), ang biktima nailhang si Myra (bansagon gitago), 40, ug nagpuyo sa Bormaheco Street, Barangay Rosary Heights 2, Cotabato City.
Sumala ni Ailyn, ang pag-umangkon sa biktima nga nagdungan sila og panihapon sa iyang iyaan human sa ilang pagpauna og panihapon sa mga bata.
Sa dihang nahuman na og kaon ang biktima ug sa iyang pag-inom og tubig, kalit lang kining misinyas sa iyang pag-umangkon kinsa nagpakitabang kay iyang natulon ang iyang pustiso.
Bisan unsaon og digwa sa biktima, di gyod mogawas ang pustiso, diin ila nalang kining gidala sa tambalanan gumikan naglisud na kini og ginhawa kay mibabag na ang pustiso sa tilaok sa biktima.
Nakadesisyon ang mga doktor sa CRMC nga operahan sa liog ang biktima ug malampusong nakuha ang pustiso.
Sa kasamtangan, anaa na sa luwas nga kahimtang biktima sud sa ospital.