KAPIN sa P167.9 bilyones nga programs, activities and projects (PAPs) sa Central Visayas alang sa sunod tuig ang giduso sa Regional Development Council (RDC) 7 atol sa unang quarter nga full council meeting niadtong Biyernes, Marso 22.
Sa P167.9 bilyones, P101.9 bilyones ang alang sa infrastructure, P59.8 bilyones sa social development, P5.3 bilyones sa economic ug P745.7 milyones sa development administration.
Sa gisugyot nga PAPs sa 2020, ang Sugbo ang makakuha sa labing dako nga pundo nga P90 bilyones, P40 bilyones alang sa Bohol, P26.3 bilyones sa Negros Oriental ug P5.2 bilyones sa Siquijor.
Sa P90 bilyones alang sa Sugbo, P58.8 bilyones ang gisugyot alang sa imprastruktura, P30 bilyoes sa social development, P846.9 bilyones sa economic, ug P344.5 bilyones sa development administration.
Apil sa mga proyekto alang sa Sugbo nga giduso alang sa 2020 mao ang pagpatukod sa Bureau of Fire Protection og mga fire station sa mga lungsod sa Sibonga, Santa Fe, Aloguinsan, Poro, Tuburan, ug Minglanilla, ug ang pagpaayo sa rehiyonal nga buhatan sa dakbayan sa Sugbo.
Ang RDC 7 nga gipangulohan ni Kenneth Cobonpue, multi-awarded furniture designer ug manufacturer, niduso usab sa mga proyekto alang sa katukoran og regional office sa Bureau of Jail Management and Penology (BJMP) 7 sa dakbayan sa Sugbo ug jail buildings sa mga siyudad sa Carcar, Lapu-Lapu, Bogo ug mga lungsod sa Bantayan, Carmen, Argao, Barili, Cordova, Oslob, ug Consolacion.
Ubos sa health facilities and enhancement program sa Department of Health (DOH) 7, ang Sugbo nangayo og P539 milyones alang sa imprastruktura, P260 milyones alang sa pagpalit og mga ekipo, P44 milyones alang sa medical transport ug uban pa. (SCG)