LAWAS sa 39 anyos nga babaye napalgan nga gilubong sa mabaw nga lungag luyo sa usa ka condominium sa Barangay Kasambagan, Siyudad sa Sugbo niadtong Biyernes sa gabii, Marso 22, human nangalisbo ang kabaho.
Sa dihang gisubay sa mga trabahante ug gwardya sa condominium ang tinubdan, ilang natultolan ang gilubngan, diin migimaw na ang tudlo sa babaye nga giilang si Josephine Ortega, 39, taga Pahina San Nicolas, Siyudad sa Sugbo.
Dali sila nga nanawag sa Mabolo police station tungod sa ilang nadiskobrehan.
Ang kapuyo niini nga si Crisanto Martinez, 35, gidakop sa kapulisan sa Mabolo police station human gidudahan nga siya ang nipatay.
Apan si Martinez nga giinterbyu sa Superbalita Cebu sa selda sa police station nanghimakak nga iyang gipatay si Ortega.
Hapit na madugta ang lawas ni Ortega dihang gikawot sa mga sakop sa Scene on the Crime Operation kay gituohan nga usa na ka semana gilubong.
Matod ni Chief Insp. Dindo Alaras, hepe sa Mabolo police station, ilang gipaubos dayon sa imbestigasyon ang mga tawo sa dapit.
Nasuta nga ka live in kini ni Martinez, taga Barangay Labangon, usa sa mga trabahante sa condominium.
Siya ang katapusang nakit-an nga kauban ni Ortega niadtong miaging Sabado, Marso 16, sa usa ka bunkhouse luyo sa condominium.
Sa gihimong follow up operation, nasikop sa Mabolo police station sa iyang balay si Martinez.
Si Martinez nagtrabaho isip maintenance sa condominium.
NAGHIKOG?
Iyang giangkon nga siya ang naglubong kang Ortega apan wa niya kini patya tungod kay naghikog kini pinaagi sa pagdunggab sa kaugalingon.
Matod ni Crisanto nga tulo na sila ka tuig nga nagka-relasyon ni Josephine.
Iyang giangkon nga iyang gibiyaan ang iyang asawa ug mga anak alang kang Ortega.
Apan niadtong Marso 9, matod ni Martinez nga nakabasa siya sa cellphone ni Ortega nga aduna kini gika-text ug nga giingong laing lalakeng gikarelasyon.
Dugang ni Martinez nga makigbuwag na siya sa babaye ug gipapauli na niya sa ilaha.
Apan giingon nga kanunay hinuon kini mag-adtuan kaniya sa bunkhouse sa iyang bag-ong gitrabahuan .
Niadtong ala una sa Byernes sa kaadlawon, Marso 22, giingong niapas si Josephine sa bunkhouse, aron makig-estorya kaniya.
Dugang pangangkon sa suspek nga subli niya kini nga gibalibaran nga magbalik sila.
Mao na lang iyang nakita nga nagdunggab sa kaugalingon si Ortega.
“Niingon lang man siya kalit nga puslan man. Maypa wala na daw makaangkon niya, maypa daw mamatay na lang siya. Nagdunggab siya sa iyang tiyan. Nakalitan na man ko, naratol ko. Nahadlok sad ko mawad-an og trabaho. Wala na ko manawag og tabang. Ako na lang diretso nahuna-hunaan nga ilubong siya. Gilabay nako ang kutsilyo.. Wala gyud nako tuyua, mao lang gyud ako nahunahuna nga ilubong na lang siya,” gitug-an ni Martinez sa Superbalita Cebu.
Gibana-bana niya nga nahitabo kini pasado alas 3 na sa kaadlawon niadtong Biyernes, Marso 22. Hinuon kon pasakaan man siya og kaso, matod niya, iya na lang atubangon ang kaso.
NAKAKITA
Usa sa mga trabahante sa condo nitug-an sa interview sa sibyaanang dyHP nga nakit-an niya si Martinez nga adunay giguyod sa luyo sa bunkhouse, apan wa lang nila kini panumbalinga.