DI NA makadagan si Konsehal Alvin Arcilla sa Cebu City north district alang sa umaabot nga May 13 elections.
Kini human nihukom ang First Division sa Commission on Elections (Comelec) pabor kang Allen Canoy, kinsa nisang-at og petition to deny due course o pagkanselar sa certificate of candidacy.
“Premises considered, the instant petition is granted. Respondent Alvin Borbajo Arcilla is ineligible to run as member, Sangguniang Panlungsod in the first district of Cebu City having been elected and having served in the same position for three consecutive terms immediately prior to the 13 May NLE,” tipik sa order ni presiding Commissioner Al Parreño niadtong Marso 19.
Ang COC sab ni Arcilla pagka konsehal gikanselar sa Comelec. Base sa pito ka pahina nga hukom, si Arcilla napili pagkakonsehal niadtong 2010,2013 ug 2016.
Si Canoy niingon nga ang pagsang-at ni Arcilla sa iyang COC sa ika-upat nga higayon kalapasan sa Section 8, Article X sa Batakang Balaod ug Section 43(b) sa Republic Act (RA) no 7160.
Dugang sa petitioner nga di madeklarar ni Arcilla nga naputol ang iyang pagserbisyo sa iyang suspension niadtong Mayo 17 hangtod Hunyo 30, 2016.
Sa iyang tubag, ang kampo ni Arcilla niingon nga interruption ang maong suspension gikan sa Office of the President.
Base sa mga ebedinsya nga giduso, ang First Division niingon nga nakaserbisyo na ang respondent sulod sa tulo ka sunodsunod nga termino.
Busa di na siya mahimong makapapili sa ika-upat nga higayon.
Ang Section 43(b) sa RA 7160 nag-ingon nga way local elective official nga moserbisyo lapas sa tulo ka termino sa samang posisyon ug ang boluntaryo nga pagbiya sa pwesto bisan unsa kataas o kamubo sa higayon di makonsiderar nga pagkabalda sa serbisyo.
Sa kaso ni Lonzanida v Comelec, ang Supreme Court niingon nga ma-disqualify ang pagdagan sa higayon nga nakaserbisyo na sulod sa three terms ug iyang hingpit naserbisyohan ang tulo ka termino.
Gumikan niini, makuhaan og usa ang slate sa Bando Osmeña Pundok Kauswagan (BOPK) sa north district.
Adunay laing pending case batok ni Konsehal Sisinio Andales kinsa sama ni Arcilla napili usab sukad niadtong 2010 ug nasuspenso og kapin sa usa ka buwan.
Si Atty. Marchel Sarno, election officer sa north district, wa pa mohatag sa iyang opisyal nga komentaryo sanglit wa pa siya kadawat og kopya.
Ang desisyon sa kaso ni Arcilla nikatap sa Facebook account nga Undo Sugbuanon kinsa adunay kapin 1,000 ka friends.
Sa pagsuwat ning taho, gikuha ang habig ni Arcilla, apan wa pa kini makaluwat og pamahayag kalabot sa hukom sa Comelec. (PAC)